«Ազատություն» ռադիոկայանն օրերս հրապարակել է հայտարարության այն նախագիծը, որը Եվրամիության անդամներն ու Արևելյան գործընկերության երկրները պատրաստվում են ընդունել նոյեմբերին կայանալիք գագաթնաժողովում։ Ըստ հրապարակման՝ ի տարբերություն երկու տարի առաջ Ռիգայում ընդունված համատեղ հայտարարության, այս տարվա նախագծում բավական ընդհանուր են ձևակերպումները տարածաշրջանի հակամարտությունների վերաբերյալ: Հասցեական չառանձնացնելով որևէ տարածքային վեճ՝ նախագիծը կոչ է անում ակտիվացնել ջանքերը խաղաղ կարգավորման ուղղությամբ՝ միջազգային իրավունքի սկզբունքների և նորմերի հիման վրա: «Հակամարտությունների կարգավորումը, վստահության կառուցումը և բարիդրացիական հարաբերությունները առանցքային նշանակություն ունեն տնտեսական ու սոցիալական զարգացման համար»,– ասված է փաստաթղթում:
Երևանի մամուլի ակումբի նախագահ Բորիս Նավասարդյանի կարծիքով՝ մինչև վերջին պահը Ադրբեջանի կողմից փորձեր են արվելու այս փաստաթղթում փոփոխություններ մտցնել։ Ըստ մեր զրուցակցի՝ արդեն բացառվում է որևէ լուրջ միջամտություն այն դրույթների հետ կապված, որոնք կարող են հակասություն առաջացնել։ «Ակնհայտ է, որ առաջին հերթին Ադրբեջանը փորձում էր տարածքային ամբողջականության և սահմանների անձեռնմխելիության հարցը արձանագրել հակամարտության բոլոր գոտիների հետ կապված։ Կարծում եմ՝ դա արդեն չի հաջողվի, որովհետև ԵՄ-ն ունի այնպիսի մոտեցում, որ այս փաստաթուղթը չպետք է կոնֆլիկտային լինի և չպետք է պարունակի որևէ դրույթ, որը հակասում է ստորագրող որևէ կողմի մոտեցումներին։ Այսպիսի վիճահարույց կետերում ԵՄ-ն կփորձի ընդհանուր մոտեցումներով սահմանափակվել, որը նաև բխում է Հայաստանի շահերից՝ այն առումով, որ ԵՄ-ն երբևէ չի եղել հակամարտությունը հաղթահարող գործիքի տեր, համապատասխան հարցերը թողնում է ԵԱՀԿ Մինսկի խմբին»,- «Առաջին լրատվական»-ի հետ զրույցում ասաց Նավասարդյանը։
Մեր զրուցակիցը միևնույն ժամանակ նշեց, որ իր դիտարկմամբ՝ Ադրբեջանի քաղաքականությունը կարող է Վրաստանում և Ուկրաինայում դժգոհություն առաջացնել։ «Որովհետև, եթե չլիներ Ադրբեջանի ցանկությունը Ղարաբաղի խնդիրը նմանեցնել Աբխազիայի, Հարավային Օսիայի, Ղրիմի, Մերձդնեստի խնդիրներին՝ գուցե լինեին այն ձևակերպումները, որոնք ձեռնտու են Ուկրաինային, Վրաստանին, Մոլդովային»,- ընդգծեց մեր զրուցակիցը։
Մեր այն հարցին՝ հնարավոր է՝ ամեն դեպքում տեղ գտնեն այնպիսի ձևակերպումներ, որոնք կհակասեն Հայաստանի դիրքորոշումներին, և արդյոք այդ դեպքում Հայաստանը կարող է մի կողմից ստորագրել ԵՄ-ի հետ նոր համաձայնագիր և մյուս կողմից էլ հրաժարվել միանալ հռչակագրին, Բորիս Նավասարդյանն արձագանքեց. «Դա սկանդալ է, եթե որևէ մեկն իր անհամաձայնությունն է հայտնում հռչակագրի դրույթների հետ կապված՝ դա հետագա համագործակցության համար լուրջ խնդիր է։ Դա ոչ մեկին պետք չէ, ընդհանուր ԵՄ քաղաքականությանը լուրջ հարված կլինի, կարծում եմ՝ այդպիսի սկանդալից և հակասական դիրքորոշումներից ձեռնպահ պետք է մնան այն երկրները, որոնք ցանականում են, որ Արևելյան գործընկերությունը հեռանկար կամ ապագա ունենա»։
Հարցազրույցն ամբողջությամբ՝ տեսանյութում։
