Ղրղըզստանի մշակույթի, տեղեկատվության և զբոսաշրջության նախարար Թուգելբայ Կազակովին պաշտոնանկ են արել զմռսված դիակի հուղարկավորության սկանդալային դեպքից հետո, որն ստացել էր «Բատկենի կույս» անվանումը: Նա 1956 թվականից պահվում էր հանրապետության պատմության թանգարանում:
Նախարարի պաշտոնանկության հրամանն արձակել է Ղրղըզստանի նախագահ Ալմազբեկ Աթամբաևը:
Ղրղըզստանում թանգարանային նմուշի սկանդալը ծագել է հոկտեմբերի կեսերին: Մշակույթի նախարարությունը որոշում էր կայացրել հուղարկավորել պատմության պետական թանգարանում պահվող զմռսված դիակը, որը հայտնաբերվել էր 1956 թվականին Բատկենի մարզում խորհրդային գիտնականների կատարած պեղումների ժամանակ:
Վերջին տարիներին մուսուլմանական հանրությունը և «էքստրասենսները» բազմիցս իշխանություններից պահանջում էին հուղարկավորել ցուցանմուշը: Նրանց կարծիքով՝ 2005 և 2010 թվականների ղրղըզական հեղափոխությունները, ինչպես նաև տնտեսական դժվարությունները և բնական կատակլիզմները Բատկենի կույսի անհանգիստ «հոգու դժգոհության» արտահայտությունն են:
Արդյունքում այն հուղարկավորվեց Բատկենի մարզում՝ մուսուլմանական ավանդույթներով: Մշակույթի նախարարությունն իր որոշումը բացատրել է ցուցանմուշի վատ վիճակով և հանրապետությունում հետազոտություն անցկացնելու հնարավորությունների բացակայությամբ:
