Կատալոնիայի կառավարության ղեկավար Կառլես Պուչդեմոնը կարող է ճաղերի հետևում հայտնվել տարածաշրջանի անկախության հռչակման համար։ Նման հայտարարություն է հնչել Իսպանիայի գլխավոր դատախազ Խոսե Մանուել Մասի կողմից։
Գլխավոր դատախազը նշել է, որ այս փուլում չէր ցանկանա հարցն այդքան սուր դնել, սակայն միևնույն ժամանակ նա կարծում է, որ միակողմանիորեն անկախության հռչակումը լուրջ խախտում է, որը պահանջում է համապատասխան միջոցառումների ընդունում։
Ավելի վաղ հաղորդվել էր այն մասին, որ դատախազությունը հայց է պատրաստել Պուչդեմոնի դեմ։ Գործը դատարան կմտնի, երբ քաղաքական գործիչը հայտարարի Իսպանիայի կազմից Կատալոնիայի դուրս գալու մասին։ Այդ դեպքում քաղաքական գործիչը կմեղադրվի խռովության կազմակերպման մեջ։
Հարկ է նշել, որ նման մեղադրանքը կարող է ավարտվել Պուչդեմոնի համար 30 տարվա բանտարկությամբ։ Հենց այդքան ժամկետ է նախատեսված Իսպանիայի օրենսդրությամբ։
Հոկտեմբերի 21-ին Իսպանիայի վարչապետ Մարիանո Ռախոյը հայտարարել էր, որ որոշում է ընդունել սահմանադրության 155-րդ հոդվածի գործարկման մասին, որը նախկինում երբեք չէր կիրառվել։
Այսպիսով՝ Իսպանիայի իշխանությունները մտադիր են արձակել Կատալոնիայի կառավարությունը և հասնել կես տարվա ընթացքում ինքնավարությունում ընտրությունների անցկացման։ Իսպանիայի սենատը պետք է հավանություն տա կառավարության առաջարկած միջոցառումներին հոկտեմբերի 27-ին։
