Վրաստանում հոկտեմբերի 21-ին անցկացված տեղական ինքնակառավարման ընտրությունների նախնական արդյունքներով իշխող «Վրացական երազանք» դաշինքի թեկնածուները քաղաքապետ են ընտրվել Թբիլիսիում, Բաթումիում, Փոթիում և Ռուսթավիում: Վրաստանի մեծությամբ երկրորդ քաղաքում` Քութաիսիում, իշխող դաշինքի թեկնածուն ստացել է ձայների մեծամասնությունը` 48 տոկոսը, սակայն այստեղ անցկացվելու է ընտրությունների երկրորդ փուլ: Իր եվրոպական զարգացման մասին հայտարարած Վրաստանում նախօրեին անցկացված ընտրություններում ընդդիմությունը հաղթանակ չի տարել ոչ մի համայնքում, ինչը խոսում է միակուսակցական կառավարման վտանգի մասին:
ԱՄՆ Ազգային- դեմոկրատական ինստիտուտի(NDI) դիտորդները ցավով արձանագրել են այս փաստն` փաստելով ժողովրդավարության էական նահանջ: Խորհրդարանական մոդելի քողի տակ փաստացի ռեստավրացվում է կառավարման խորհրդային համակարգը, որտեղ իշխանությունն ապահովում է ոչ թե քաղաքական մրցակցային միջավայր, այլ` մեկ կուսակցության հաղթանակը: Վրացական ներքաղաքական կյանքն ունի տարածաշրջանային համատեքստ, եթե հաշվի առնենք` մի կողմից, ռուս-վրացական հակադրությունը, մյուս կողմից` Հարավային Կովկասի եվրաինտեգրման հեռանկարը` հենց վրացական գործոնի շնորհիվ: Այս երկու հարթության վրա շաբաթ օրը վրացական դեմոկրատիան արձանագրել է էական նահանջ` հարևան երկրի քաղաքական համակարգում արմատավորելով, այսպես կոչված, եվրասիականության էլեմենտներ:
Ռուս-վրացական հակադրությունը շատ դեպքերում քաղաքակրթական է ընկալվում և տեսանելի է, որ վերջին ընտրություններում Վրաստանն էապես կորցրել է իր հաղթաթուղթը:
Մյուս կողմից` վերջին տաս – տասնհինգ տարիներին Վրաստանի քաղաքական համակարգը որոշակիորեն էտալոնային էր համարվում Հայաստանի համար և դա օբյեկտիվ է` հաշվի առնելով այն հանգամանքը, որ Վրաստանը Հայաստանի համար կարևոր հարթակ է Եվրամիության ու հատկապես` ՆՍՏՕ-ի հետ համագործակցություն ծավալելու տեսանկյունից:
Վրաստանի ժողովրդավարական իմիջի կորուստը միայն բացասական ազդեցություն կունենա Հայաստանի վրա` մասնավորապես և տարածաշրջանում` առհասարակ: Չենք կարող չնկատել մեկ կարևոր հանգամանք ևս: Կառավարման մոդելի և քաղաքական համակարգի կառուցվածքի մասով Հայաստանն, ըստ էության, ընդօրինակում է վրացական փորձը` խորհրդարանական կառավարման անվան տակ «օրինականացնելով» միակուսակցական համակարգը:
Ընդ որում, եթե Սերժ Սարգսյանը որոշի 21-ի ապրիլից երկիրը ղեկավարել ստվերից` չզբաղեցնելով վարչապետի պաշտոնն, ապա Հայաստանը կունենա նաև իր «Իվանիշվիլին»:
