Անհարիր է, հնարավոր չէ ինձ որպես հակաարևմտյան պիտակավորելը կամ դրանում մեղադրելը: Այդ մասին «Առաջին լրատվական»-ի հետ զրույցում ընդգծեց ԱԺ «Հանրապետական» խմբակցության պատգամավոր Միհրան Հակոբյանը՝ անդրադառնալով հարցին, թե Եվրաինտեգրման հանձնաժողովում ինչպես է աշխատելու, նա առավել հայտնի է որպես հակաարևմտյան գործիչ:
«Ես հայ քաղաքական գործիչ եմ: ԱԺ պատգամավոր եմ, չեմ կարող լինել հակաարևմտյան, հակառուսական, պրոռուսական, պրոարևմտյան կողմնորուշումների կրող: Ես մի դիրքորոշման կրող եմ՝ Հայաստանի Հանրապետության»,- ընդգծեց նա:
Անդրադառնալով դիտարկմանը, որ ժամանակին խնդիրներ է ունեցել նաև ԱՄՆ դեսպանատան հետ՝ իր ֆեյսբուքյան ստատուսների հետ կապված, Միհրան Հակոբյանն ասաց.
«ԱՄՆ դեսպանատնից ես մեկ անգամ եմ մուտքի վիզա խնդրել, ինձ տրամադրել են 10 տարով: Ծրագրի մասնակցություն կար՝ որպես դիտորդ իրենց դեսպանատան կողմից կազմակերպված, իրենք նպատակահարմար չգտան, որպեսզի ես մասնակցեմ, բայց ես հետագայում դիմել եմ դեսպանատուն, 10 տարով վիզա եմ ստացել և ԵԱՀԿ առաքելության կողմից որպես դիտորդ մասնակցել եմ ԱՄՆ-ում տեղի ունեցած ընտրություններին: Ես չեմ կարող կապել մեկը մյուս հանգամանքի հետ, այսինքն՝ Եվրաինտեգրման հանձնաժողովում կամ տնտեսական, արտաքին հարաբերությունների հանձնաժողովում աշխատելու հետ»:
Անդրադառնալով դիտարկմանը, որ այն ժամանակ խոսքի տեռոր էր անվանել վիզա չտրամադրելը, Միհրան Հակոբյանն ասաց.
«Որակել էի՝ խոսքի տեռոր, որովհետև ԱՄՆ դեսպանատան հետ եղել էր խնդիր՝ կապված ֆեյսբուքյան ստատուսների հետ: Իրենք նպատակահարմար չէին գտել, որպեսզի նման վերաբերմունք ունեցող մարդը մասնակցի իրենց ծրագրին: Ես հարգանքով եմ վերաբերվել իրենց որոշմանը: Կարծում եմ, որ տհաճ է, երբ մարդուն տեղեկացնելուց առաջ, տեղեկատվությունը հայտնվում է մամուլում, դա եղել միակ խնդիրը, բայց կարծում եմ, որ ԱՄՆ դեսպանատան հետ մենք միմյանց հասկացել ենք»,- շեշտեց նա:
Մանրամասները՝ տեսանյութում: