«Ընտանեկան բռնության կանխարգելման մասին» օրենքի նախագծում մտահոգիչ դրույթներ կան ձևակերպումների հետ կապված, բայց օրենքը չընդունելու մասին որևէ կարծիք ինձ համար ընկալելի չէ և այդտեղ որևէ փաստարկ չկա։ Այդ մասին «Առաջին լրատվական»-ի հետ զրույցում նշել է «Ելք» խմբակցության պատգամավոր Մանե Թանդիլյանը։
Նրա խոսքերով՝ պնդումները, թե այս օրենքի արդյունքում մեզնից խլելու են մեր երեխաներին, ճիշտ չեն, նման բան օրենքում չկա։ «Եթե որևէ մեկը նման հռետորաբանություն է օգտագործում, ես հասկանում եմ, որ ոչ միայն նա օրենքին չի ծանոթացել, այլև չի ցանկանում, որ ընտանիքներում բռնության երևույթը վերացվի։ Այդ առումով ես կարծում եմ, որ այս օրենքը հեղաշրջող դեր կարող է խաղալ մեր հասարակության առողջացման գործում, որովհետև ընտանիքը պետության բջիջն է, որտեղից պետք է առողջ մարդիկ դաստիարակվեն ու դուրս գան»։
Մանե Թանդիլյանը համոզմունք հայտնեց, որ օրենքի իրական կյանքում կիրարկման դեպքում առաջընթաց կապրի մեր ամբողջ հասարակությունը։
Անդրադառնալով օրենքի նախագծին դեմ արտահայտվողներին՝ Թանդիլյանը նշեց. «Երբ տեսնում ես, թե ովքեր են դեմ արտահայտվողները և ինչ փաստարկներ են բերում, հասկանում ես, որ պարզապես չեն ցանկանում օրենքի դրույթներին ծանոթանալ։ Ես անգամ առաջարկ եմ լսել, որ պետք է օրենքը հաստատել Մայր Աթոռում։ Այդ մարդկանց պետք է հուշել, որ մենք աշխարհիկ պետություն ենք՝ չթերագնահատելով եկեղեցու դերը մեր կյանքում, բայց զարմանում ես, թե այդ մարդիկ որտեղից են եկել և ինչի մասին են խոսում։ Երբ հետևում ես, թե ովքեր են դեմ արտահայտվողները, ակնհայտ է, որ այդտեղ կա ռուսական ազդեցություն, ռուսական ֆոբիաների ազդեցությունը այդ մարդկանց հռետորաբանության մեջ, ինչն ինձ համար անհասկանալի է»։
