Մաքսային միությանը Հայաստանի անդամակցությունը հակասահմանադրական քայլ է, և այդ քայլով ՀՀ-ն ակնհայտորեն զիջում է իր՝ Սահմանադրությամբ ամրագրված ինքնիշխանությունը ՄՄ-ի վերպետական մարմնին: Նման կարծիք հայտնեց «Ազատ դեմոկրատներ» կուսակցության վարչության անդամ, մամլո խոսնակ Անժելա Խաչատրյանը Գլոբալիզացիայի և տարածաշրջանային համագործակցության վերլուծական կենտրոն ՀԿ-ի և Չեխիայի դեսպանատան կազմակերպած «Արևելյան գործընկերության չորս տարիներ. արդյուքներ և մարտահրավերներ» թեմայով քննարկման ժամանակ:
Նա նկատեց, որ Ասոցացման համաձայնագրի մասին քննարկումներում հաճախ էր շահարկվում Ղարաբաղի անվտանգության հարցը, խոսվում էր այն մասին, թե երբ Հայաստանը ստորագրի Խոր և համապարփակ ազատ առևտրի մասին պայմանագիրը, ապա ԼՂՀ-ն տարանջատվելու է և ունենալու է առանձին մաքսային սահման: Սակայն, ըստ Անժելա Խաչատրյանի, այսօր, երբ ՀՀ իշխանությունները պատրաստակամություն են հայտնել միանալու Մաքսային միությանը, ցավալիորեն, շատ քչերն են հասարակական-քաղաքական քննարկումների ժամանակ բարձրացնում նույն այդ անվտանգության հարցը:
«Երբ խոսում ենք Ղարաբաղի անվտանգության մասին, արդյոք մեզ չի՞ մտահոգում այն փաստը, որ մեր ինքնիշխանությունը, արտաքին քաղաքականություն իրացնելու կարևորագույն լիազորությունները զիջելու ենք մի միության, որտեղ որոշիչ է այն երկրի ձայնը, որը զենք է վաճառում մեր հարևան և մեր նկատմամբ մեղմ ասած ոչ բարիդրացիական տրամադրված Ադրբեջանին, արդյոք հենց այդ ժամանակ մենք վտանգի տակ չե՞նք դնում ԼՂՀ և ընդհանրապես ՀՀ անվտանգությունը:
Զարմանալի և միևնույն ժամանակ ցավալի է, որ այս խնդրի քննարկումը բացակայում է հայաստանյան հասարակական-քաղաքական բանավեճերում»,- ասաց նա:
Անժելա Խաչատրյանի դիտարկմամբ, միակ ուրախալի փաստն այսօր այն է, որ ՀՀ Սահմանադրության 1-ին և 2-րդ հոդվածները, համաձայն որոնց ՀՀ-ն ինքնիշխան պետություն է, և որ ՀՀ-ում իշխանությունը պատկանում է ժողովրդին, փոփոխման ենթակա չեն, և առաջիկայում նախատեսվող սահմանադրական փոփոխությունների ժամանակ այդ կարևոր դրույթները մենք չենք կորցնի:
Խոսելով վերոնշյալ խնդիրների շուրջ հայաստանյան երիտասարդների դիքորոշման մասին, «Ազատ դեմոկրատներ» կուսակցության վարչության անդամը նշեց, որ հայ երիտասարդներն այսօր իրենց մոտեցումներով և արժեքային ընկալումներով որևէ առնչություն չունեն Մաքսային միություն կոչված համակարգի հետ, ու այս սերնդի համար եվրոպական ուղղությունն այլընտրանք չունի, քանզի նրանց առավել մոտ ու հոգեհարազատ է արևմտյան արժեհամակարգը, որի կրողն է ԵՄ-ն:
