ԱՄՆ նախագահ Դոնալդ Թրամփի վարչակազմը կչեղարկի ամերիկյան ԱԷԿ-ների նկատմամբ գործող՝ ածխածնի արտանետումների սահմանափակումները, գրում է The Wall Street Journal-ը։ Վնասակար արտանետումների կրճատման մասին օրենքը, որն ընդունվել էր Բարաք Օբամայի օրոք, բազմիցս քննադատվել է Թրամփի կողմից, ով համարում է, որ այդ նախաձեռնությունը վնաս է հասցնում արդյունաբերական ձեռնարկություններին, մասնավորապես, ածխայիններին։
Շրջակա միջավայրի պաշտպանության ամերիկյան գործակալության ղեկավար Սկոտ Պրյուիտը Կենտուկի նահանգում ելույթի ժամանակ հայտարարել է, որ այսօր կստորագրի առաջարկ՝ արտանետումների մասին օրենքի առանցքային դրույթների չեղարկման մասին։ Նա նշել է, որ նախկին վարչակազմն անխիղճ է գտնվել։ «Այն օգտագործել է բոլոր ռեսուրսներն ու լիազորությունները՝ անձամբ որոշելու մեր երկրում էլեկտրաէներգիայի արտադրության իրավունքի համար պայքարում հաղթողներին ու պարտվողներին»,-ասել է նա։
Մայիսին հայտնի էր դարձել, որ ԱՄՆ-ը դուրս է գալիս Կլիմայի հարցով փարիզյան համաձայնագրից։
