Սյունիքի նախկին մարզպետ, ՀՀԿ խորհրդի անդամ Սուրիկ Խաչատրյանը «Առաջին լրատվական»-ի հետ զրույցում հայտնեց, որ նոյեմբերի 5-ին կայանալիք Գորիսի քաղաքապետի ընտրություններին չի աջակցի ՀՀԿ-ական 26-ամյա թեկնածու Առուշ Առուշանյանին:
«Գորիսը թեկնածուների առումով նման տառապյալ փորձ ունեցել է նաև սովետի տարիներին, երբ որ «Միկրոշարժիչ» գործարանի բանվորին 86 թվականին բերեցին նշանակեցին քաղխորհրդի նախագահ: Դրանից ժողովուրդը շատ չտուժեց, կարծում եմ, որ հիմա էլ շատ չի տուժի»,-մեզ հետ զրույցում ասաց Խաչատրյանը:
Հարցին, թե դե՞մ եք երիտասարդ թեկնածուին, Սուրիկ Խաչատրյանը նշեց. «Նենց չի, որ դեմ եմ, կողմ եմ: Ամեն դեպքւմ տառապյալ փորձը կա»:
Ճշտող հարցին, չե՞ք աջակցի, Խաչատրյանը ավելացրեց. «Իհարկե, ոչ»:
Հիշեցնենք, որ Առուշանյանի և Սուրիկ Խաչատրյանի հարաբերությունները վաղուց լարված են: Երեք տարի առաջ Խաչատրյանի մերձակա շրջապատի անձանցից մեկը ծեծի էր ենթարկել Առուշանյանին պատկանող խանութի աշխատակիցներից մեկին, և Առուշանյանը ոստիկանությունում տվել էր Դերենիկ Ղևոնդյանի անունը, ասելով, որ նա ծեծի է ենթարկել աշխատողներից մեկին: Դերենիկ Ղևոնդյանը Սյունիքի նախկին մարզպետ Սուրիկ Խաչատրյանի վարորդի որդին է:
Հիշեցնենք նաև, որ Առուշ Առուշանյանը Սյունիքում հայտնի գործարար, «Առանցք» ընկերության սեփականատեր Գագիկ Առուշանյանի որդին է: Առուշ Առուշանյանն իր հերթին «Գորմետալ» ՍՊԸ-ի հիմնադիր տնօրենն է: Ինչպես հայտնի է՝ նա խորհրդարանական ընտրություններում առաջադրվել էր ՀՀԿ ռեյտինգային ցուցակով, գրավել երրորդ տեղը, սակայն ԱԺ չհասավ ընտրություններից հետո իր հաղթանակի առթիվ խնջույքի ժամանակ մարդ ծեծելու պատճառով: Նրա հայրը՝ Գագիկ Առուշանյանը, շատ լավ հարաբերությունների մեջ է մարզպետ Վահե Հակոբյանի հետ:
