Փոթորիկ էր մի կաթիլ ջրում, որովհետև սպորտի նախարարը այդ համակարգի պատասխանատուն է և խնդիրն է ներկայացրել, փաստն է արձանագրել: Այս մասին «Առաջին լրատվական»-ի հետ զրույցում ասաց ԱԺ «Ծառուկյան» խմբակցության պատգամավոր Սերգեյ Բագրատյանը՝ անդրադառնալով քննարկումներին, թե Հրաչյա Ռոստոմյանի հայտարարությունը Սամվել Կարապետյանի վերաբերյալ առաջին հարվածն էր վարչապետին և խոսում է այն մասին, որ Սերժ Սարգսյանը և «Ծառուկյան» դաշինքը կարող են վարչապետին հեռացնելու համար դառնալ բնական դաշնակիցներ:
«Որևէ ենթատեքստ տեսնել պետք չէ, լինի սպորտի նախարար, թե էկոնոմիկայի՝ յուրաքանչյուրը պիտի իր գործառույթները իրականացնի: Խնդիր է առաջացել, որն ընդամենը ներկայացրել է: Դրանից հեռուն գնացող ենթադրություններ անելը ավելի շուտ ինտրիգային է, քան իրականություն: Ցանկանում եմ շատ ավելի պարզ նայենք իրերին, քան մենք որոշել ենք վերլուծականներով այլ դաշտեր տեղափոխել:
Փաստն այն է, որ ՀՀԿ-ն՝ երկրի նախագահի գլխավորությամբ, կառավարություն է կազմել, և վարչապետ է նշանակվել Կարեն Կարապետյանը, ի՞նչ է նշանակում՝ վարչապետին հեռացնելու համար միավորվել «Ծառուկյան» դաշինքի հետ. եթե երկրի նախագահը ՀՀԿ ղեկավարն է և ցանկանում է վարչապետին այլևս թույլ չտալ պաշտոնավարել, չեմ կարծում, որ նման խնդիր գոյություն ունի: Եթե Հանրապետական կուսակցությանը վարչապետի աշխատանքը չի բավարարում, իրենք առանց այլևայլության կարող են վարչապետից ազատվել, ինչպես եղել է նախկին վարչապետերի ժամանակ: Չեմ կարծում՝ դա բարդ խնդիր է, և դրա համար անհրաժեշտ է «Ծառուկյան» դաշինքի օգնությունը»,-շեշտեց նա:
Մանրամասները՝ տեսանյութում:
