Լաս Վեգասի հրաձիգ Ստիվեն Պեդոկի տանն անցկացված խուզարկությունների ընթացքում ոստիկանությունը հայտնաբերել է 18 միավոր զենք, պայթուցիկ նյութեր և փամփուշտներ։ Այս մասին հայտարարել է Լաս Վեգասի շերիֆ Ջոզեֆ Լոմբարդոն, փոխանցում է CNN-ը։
«Այժմ ես կարող եմ ներկայացնել հստակ տվյալներ Նևադա նահանգի Մեսկիտ բնակավայրում չարագործի տանը կատարված խուզարկության արդյունքների վերաբերյալ։ Այնտեղ հայտնաբերվել է 18 միավոր հրազեն, զինամթերք, պայթուցիկ նյութ և էլեկտրոնային սարքեր, որոնք մենք ներկա պահին ուսումնասիրում ենք»,-ասել է Լոմբարդոն մամլո ասուլիսի ժամանակ։
Հայտնի է դարձել նաև, որ հրաձիգի մեքենայում հայտնաբերվել են նյութեր՝ նախատեսված պայթուցիկների պատրաստման համար, այդ թվում ամոնիումի նիտրատ։
Ընդհանուր առմամբ՝ չարագործի տանը, մեքենայում և հյուրանոցի համարում հայտնաբերվել է 33 միավոր զենք։
Նշվում է, որ զենքի գնումից առաջ նա հաջող կերպով ստուգում էր անցել տվյալների դաշնային բազաներում։ Նախկինում նա քրեական պատասխանատվության չի ենթարկվել։
