Ֆրանսիայում հեռուստա- և ռադիոհաղորդավարներին արգելվել է եթերում արտասանել Facebook և Twitter բառերը: Բացառություն կկազմեն միայն այն դեպքերը, երբ սոցիալական այս ցանցերը կդառնան լուրերի թեմա: Ֆրանսիայի բարձրագույն հեռահաղորդակցության խորհրդի այս որոշման մասին գրում է Mashable կայքը:
Խորհուրդը որոշում է կայացրել եթերում արգելել կոչերը, որ հեռուստադիտողները և ռադիոունկնդիրները միանան այս կամ ընկերության էջերին, որոնք բացված են սոցիալական ցանցերում: Սակայն չի արգելվել «փնտրե՛ք մեզ սոցիալական ցանցերում» արտահայտությունը: Խորհուրդն իր այս որոշումը հիմնավորել է նրանով, որ կոչ անելով միանալ այս կամ այն էջին` իրականացվում է թաքնված գովազդ, ինչն արգելված է 1992 թ. համապատասխան օրենքով:
Մինչդեռ որոշ վերլուծաբաններ խնդրին այլ կերպ են նայում: Կանադացի լրագրող Մեթյու Ֆրեյզերն ասել է, որ այս քայլով ֆրանսիացիները ցուցադրում են «իրենց հոգեկերտվածքի խոր թշնամանքը անգլոսաքսոնական մշակութային գերիշխանության նկատմամբ»: