Շուրջ հինգ տարի է, ինչ դատարանում քննվում են 2008 թվականի հոկտեմբերի 25-ին Աղավնաձորից Հրազդան գնալու ճանապարհին «Մերսեդես-Բենց Ե 320» մակնիշի և «Վազ 21-06» մեքենաների բախման հետևանքով վթարի մանրամասները: Այս տարվա հունիսին դատարանը վթարի համար մեղավոր է ճանաչել «Մերսեդես-Բենց Ե 320»-ի ուղևոր Մկրտիչ Դանիելյանին:
Դանիելյանների ընտանիքը բազմիցս բողոքել է և գլխավոր դատախազությունից պահանջել արդարացի վճիռ, սակայն ոչինչ չի փոխվել:
Այսօր լրագրողների հետ հանդիպմանը պաշտպան, ՀՀ փաստաբանների պալատի անդամ Նիկոլայ Բաղդասարյանն ասաց, որ խնդիրն այն է, որ մեքենայի մեջ եղած երկու անձն էլ պնդում են, որ իրենք չեն եղել մեքենայի ղեկին: Անցկացվել է չորս փորձագիտական հետազոտություն, որից միայն մեկում է նշվել, որ հնարավոր է՝ Մկրտիչ Դանիելյանը ղեկին եղած լինի: Սա հիմք ընդունելով՝ կայացվել է վճիռ, և արդարացվել է մեքենայի մյուս ուղևորը՝ Գագիկ Հովսեփյանը:
«Սկզբում Գագիկ Հովսեփյանը խոստովանել է, որ ինքն է եղել ղեկին, սակայն Մկրտիչ Դանիելյանը կոմայի մեջ էր: Այդ ժամանակ Գ.Հովսեփյանը հրաժարվել է իր ցուցմունքից, արդարացվել և հեռացել երկրից,- ասաց փաստաբանը:
Նրա հավաստմամբ՝ դատախազն իր անձնական շահերից ելնելով՝ փորձում է հակառակ պատկեր ներկայացնել, իսկ դատարանը լավություն է անում դատախազին. առանց խորանալու գործի մեջ՝ փորձում է դատախազին լավություն անել:
Ըստ դատավճռի՝ Մկրտիչ Դանիելյանը դատապարտվել է յոթ տարվա ազատազրկման: Եթե հաշվի առնենք նախագահի համաներումը, ապա պատժի չափը կնվազի, սակայն Դանիելյանները շարունակում են արդար դատավճիռ պահանջել:
Լուսանկարը՝ PanARMENIAN Photo-ի
