Երիտասարդությանը անհրաժեշտ է մշտապես պահել ուշադրության կենտրոնում: Հոկտեմբերի 10-ին Հայաստանի երիտասարդական խորհրդարանի ներկայացուցիչների հետ հանդիպմանը Համաշխարհային հայկական կոնգրեսի և Ռուսաստանի հայերի միության նախագահ Արա Աբրահամյանը նշեց, որ իրենք Ռուսաստանում անցկացնում են միավորիչ աշխատանքներ:
«Տասնինը տարի մենք կազմակերպում ենք Ռուսաստանի կարևոր տոներից մեկը՝ նոյեմբերի 4-ը՝ Համաձայնության օրը, երբ տոնակատարություններն անցկացնում ենք մենք: Նաև երիտասարդական մրցույթներ ենք կազմակերպում, բիզնեսի զարգացմանը ևս ուշադրություն ենք դարձնում: Եթե մեկը բիզնեսով է զբաղվում, հաջողության է հասել, մենք օրինակ ենք բերում նրան՝ ոչ թե նախանձ, ձգտում առաջացնելու համար»,- ասաց նա:
Աբրահամյանի խոսքով՝ մշակույթի, սպորտի բնագավառներում ծրագրեր կան, կարևորվում է երիտասարդության առողջությունը: Նա նշեց, որ մշտապես սովորում է երիտասարդներից, որովհետև նրանք ավելի շատ բան գիտեն: ՌՀՄ նախագահը տարեկան առնվազն 5-7 անգամ լինում է Հայաստանում: Նրա խոսքով՝ Հայաստանից դուրս հայ մարդը հետևում է օրենքներին, մինչդեռ այստեղ չի ենթարկվում դրանց: «Ամերիկայում նա արդեն անգամ հայ էլ չի, գիտի, որ մեկ է՝ պատասխանատվություն է կրելու օրենքի առաջ, իսկ մեզ մոտ կասի՝ ի՞նչ է եղել, խփել է, էլի՛: Մենք միշտ «բայց»-եր ենք գտնում, պատճառներ: Ես հիվանդանոցում եմ մեծացել: Հայրս բժիշկ էր աշխատում, մինչև տասնհինգ տարեկան ապրել եմ այնտեղ, դա իր ազդեցությունը թողել է, ես շատ եմ սիրում մարդուն»,- ասաց նա:
Աբրահամյանի խոսքով՝ տպավորություն է, որ Հայաստանում բոլոր կառույցները կան, կան տարբեր կուսակցություններ, նախագահին կից խորհուրդ, և անհասկանալի է՝ ինչն է ագրեսիայի պատճառը: Մենք օրինակներ չունենք՝ ինչպես հերոսանալ, ուստի հիմա բիզնեսում հաջողություններ ունեցող հայ երիտասարդներին են նկարահանում՝ իբրև օրինակ: Հայաստանից դուրս հայ մնալու, Հայաստան ներգաղթ կազմակերպելու խնդիրներին անդրադառնալով՝ Աբրահամյանը նշեց, որ ՌՀՄ-ն տարեկան 3000 միջոցառում է կազմակերպում: «Ես պարտավոր չեմ ինչ-որ բան անել, որպես հայրենիք սիրող մարդ եմ ամեն ինչ անում: Ես հավատացյալ մարդ եմ, Աստված ինձ այդ հնարավորությունը տվել է, փորձում եմ այն կիսել: Ինձ հարցնում են՝ գնանք Հայաստան, որտե՞ղ աշխատենք: Հիմա փորձում ենք աշխատատեղեր ստեղծել: Տեսեք այսօր Սիրիայից եկած հայերի վիճակը. եղածն ի՞նչ է՝ 10 000 տուն կառուցել ազգով. հնարավորություն կա, բայց դեռ չենք անում: Մենք պետք է բոլորս փոխվենք»,- ասաց նա:
Մաքսային միությանն անդամակցելու Հայաստանի որոշմանն անդրադառնալով՝ ՌՀՄ նախագահը նշեց, որ երբեմն զարմանում է, երբ տեսնում է՝ կեղծ բաներ են գրում: Կարծում է՝ պետք է բոլորս տեսնենք՝ որն է մեր շահը, գնանք այնտեղ:
Ըստ Արա Աբրահամյանի՝ հայերը երբեք ռուսների հետ խնդիր չեն ունեցել: Թուրքերը, ադրբեջանցիները, մի քանի այլ ազգեր շատ վատ են վերաբերվում իրեն, քանի որ շատ ակտիվ է: ՌՀՄ ղեկավարը հպարտությամբ նշեց, որ իր ժամանակի 80 տոկոսը ծախսում է մարդկանց օգնելու վրա, օգնում է բոլոր դիմողներին, անկախ նրանից՝ արժանի են, թե ոչ:
Լուսանկարը՝ PanARMENIAN Photo-ի
