ԱՄՆ-ում Երկրորդ համաշխարհային պատերազմի վետերանը դատական նիստի ժամանակ խոստովանել է, որ վերջին տարիներին զբաղվել է թմրանյութերի փոխադրումներով: Այս մասին հայտնում է ITAR-TASS-ը:
Միչիգան-սիթիի (Ինդիանա նահանգ) բնակիչ Լեո Շարպը, ով շուտով կդառնա 90 տարեկան, ձերբակալվել էր 2011 թվականին: Նրա մեքենան, որում հայտնաբերվել էր ավելի քան 90 կգ կոկաին, ոստիկանները Դեթրոյթում կանգնեցրել էին փաստաթղթերը ստուգելու նպատակով: Տարեց տղամարդն այնքան էր հուզվել, որ փաստաթղթերը ներկայացնելու պահանջի դիմաց ասել էր. «Պարզապես կրակե´ք և ինձ թույլ տվեք լքել այս աշխարհը»:
Ինչպես պարզվել էր՝ դա եղել է ապօրինի բեռով նրա ոչ առաջին ուղևորությունը: Դատախազության տվյալներով՝ 2000 թվականից նա արևմտյան ափից ավելի քան 600 կգ կոկաին և մարիխուանա է տեղափոխել:
Շարպը դարձել է ամենատարեց հանցագործներից մեկը, որը երբևէ կանգնել է Դեթրոյթի դաշնային դատարանի առջև: Նրա խոսքով՝ ինքը ստիպված է եղել թմրանյութերի փոխադրումներով զբաղվել, քանի որ գումարի կարիք է ունեցել:
Թմրանյութերի մաքսանենգության համար նրան սպառնացել է առնվազն 14 տարվա ազատազրկում, սակայն մեղադրող կողմը հայտարարել է, որ ընդամենը 5 տարվա ազատազրկում կպահանջի: Դատախազությունը հաշվի է առել նրա տարիքն ու ծառայությունները երկրի առջև:
Արդյունքում դատարանը տղամարդու դեմ 500 հազար դոլարի տուգանք է սահմանել: Բացի այդ, նրանից կառգրավվի ծաղկային ջերմոցը, որտեղ նա շուշաններ է աճեցրել:
