Грузия Online-ի փոխանցմամբ, օրեր առաջ Մոսկվան պաշտոնապես հայտարարեց, թե Վանուատուն ճանաչել է Աբխազիայի անկախությունը։ Սակայն ՄԱԿ-ում Վանուատուի դեսպան Դոնալդ Կալպոկասը չի հաստատել այդ տեղեկատվությունը։
Ավելին՝ նա հայտարարել է, որ այդ հարցն ընդհանրապես իրենց օրակարգում չէ։ Չնայած դրան՝ Ռուսաստանի ԱԳՆ-ն շտապել էր ի լուր աշխարհի բարձրաձայնել աբխազական դիվանագիտության հաղթանակի մասին։
Դոնալդ Կալպոկասը մասնավորապես նշել է. «Ես կապվեցի մեր արտգործնախարարի հետ, որը երկրի երկրորդ դեմքն է և հարցրեցի Աբխազիայի անկախության ճանաչման մասին, նա ինձ ասաց, որ Վանուատուն այդ կապակցությամբ որևէ որոշում չի ընդունել։
Ես նաև երկրորդ անգամ նույն թեմայով կապվեցի նրա հետ, և երկրորդ դեպքում էլ ստացա նույն պատասխանը։ Մենք ճանաչում ենք Վրաստանի ինքնիշխանությունն ու տարածքային ամբողջականությունը։ Մենք լավ հարաբերություններ ենք պահպանում Վրաստանի հետ, և կարծում եմ, որ շուտով դիվանագիտական հարաբերություններ կհաստատենք այդ երկրի հետ»։
Հիշեցնենք, որ մինչ այս Աբխազիայի անկախությունը ճանաչել են Ռուսաստանը (26.08.2008), Նիկարագուան (05.09.2008), Վենեսուելան (10.09.2009), Նաուրուն (15.12.2009)։
