Վերակազմավորվող ՀՀՇ կուսակցության անդամ Արարատ Զուրաբյանը, խոսելով Հայաստանի ՄՄ անդամակցությունից, նշեց, որ իշխանությունը գնաց այն ճանապարհով, որ մի քիչ զարմանք է առաջացնում, քանի որ մինչև սեպտեմբերի 3-ը հստակ գնացինք Եվրոպա, բայց մեկ օրվա մեջ ամեն ինչ փոխվեց, և հիմա գնում ենք ՄՄ:
Արարատ Զուրաբյանի կարծիքով` Հայաստանի համար եվրոինտեգրումը շատ կարևոր էր, հիմա մենք դուրս մնացինք այս գործընթացից, և միայն մենք դուրս մնացինք, քանի որ Ուկրաինան, Մոլդովան և Վրաստանը շարունակում են այս գործընթացը և, ըստ ամենայնի, կնախաստորագրեն:
Անդրադառնալով նրան, թե ինչ է Մաքսային միությունը, նա նշեց, որ որևէ մեկը չի կարող ասել այդ մասին: Ըստ նրա` կորուստներ կլինեն:
Արարատ Զուրաբյանն արդեն մեկ կորուստ արձանագրել է: Նա հիշեցրեց, որ թեև Սերժ Սարգսյանը ԿԳ նախարարությունում հայտարարեց, որ աշխատավարձերը կրկնակի բարձրանալու են, սակայն սեպտեմբերի 3-ից մի քանի օր հետո վարչապետը հայտարարեց, որ աշխաավարձերը կավելանան ոչ թե նոր տարուն, այլ ամռանը: Նա նշեց, որ անվտանգության խնդիրը մեջտեղ բերելով՝ իշխանություններն այնքան միամիտ չէին, որ հաշվի չառնեին այդ հանգամանքը: Բայց Չորս տարի ընթացող գործընթացում Հայաստանը, նրա կարծիքով, հաշվի էր առել այդ հանգամանքը:
Ըստ նրա` եթե մեր տնտեսությունը զարգանար, մենք ունենայինք զարացած արդյունաբերություն, բյուջետային լուրջ մուտքեր, չէինք կանգնի այն փաստի առջև, որ Ադրբեջանի ռազմական բյուջեն անցնի երեք միլիարդից:
Եթե Արցախը ՄՄ-ից դուրս է մնում, արդյոք կունենա՞ն մեկ միասնական սահման Հայաստանն ու Արցախը: Այս առթիվ Արարատ Զուրաբյանը նկատեց, որ Ղազախստանը հարց կբարձրացնի Արցախի հետ կապված, և մի բան պետք է նկատի ունենալ. ցանկացած պարագայում մեր իշխանությունները պատրաստ պետք է լինեն բոլոր մարտահրավերներին դիմակայելու և փորձելու ինչ-որ առավելություն հասնել այս հարցում:
«Կարծում եմ` հայտարարության օրը Սերժ Սարգսյանը կարող էր ինչ-որ պայմանավորվածության գալ, որ Արցախ բառը արտահայտվեր, և դրա վերաբերյալ որևէ բան տեղի ունենար, ցավոք, դա տեղի չուենցավ»,- ասաց նա:
Բանախոսը նշեց, որ Եվրոպան չի հրաժարվի Հայաստանից, ԵՄ ասոսացման պայմանագիրը այն տեսքով, որ պետք է ստորագրվեր, չի ստորագրվի, բայց իշխանություններն էլ բանակցում են, որ ինչ-որ բան ստորագրվի, ու թե ինչ կստորագրվի՝ այսօր հստակ որևէ բան ասել հնարավոր չէ: Նա նշեց, որ սրանք մեր բաց թողնված հնարավորությունների տարիներ են, և պետք է արձանագրել մի բան. Հայաստանը կարող էր շատ ավելի լուրջ զարգացում ապրել, բայց, ցավոք, կաշկանդվել է նույն իշխանության վարած քաղաքականության պատճառով:
