Ադրբեջանական Anspress.com կայքի փոխանցմամբ՝ Ադրբեջանի արտգործնախարար Էլմար Մամեդյարովն ԱՄՆ-ում հանդիպում է ունեցել Պետնախարար Հիլարի Քլինթոնի հետ։
Հանդիպման ժամանակ Քլինթոնն ընդգծել է երկկողմանի հարաբերությունների ռազմավարական կարևորությունը։ Բացի այդ, նա նշել է այն հարցերի շրջանակը, որի վրա կողմերը պետք է համատեղ աշխատանքներ տանեն։ Խոսքը գնում է երկկողմանի հարաբերությունների, տարածաշրջանային ու գլոբալ խնդիրների մասին։
Ղարաբաղյան հակամարտության կարգավորման վերաբերյալ Քլինթոնը նշել է, որ ԱՄՆ-ը ու Ադրբեջանը շարունակելու են ԵԱՀԿ Մինսկի խմբի միջնորդությամբ խնդրի կարգավորման ուղղությամբ տարվող ջանքերը։
Մամեդյարովն իր հերթին նշել է. «Երկու երկրների միջև հարաբերությունները շատ լավ են զարգանում և կրում են ռազմավարական բնույթ։ Երկու երկրներին անհրաժեշտ է առավել ամրապնդել իրենց համագործակցությունը։
Ոչ վաղ անցյալում ԱՄՆ-ի, Ռուսաստանի ու Ֆրանսիայի նախագահները ղարաբաղյան հակամարտության կարգավորմանն առնչվող հայտարարություն հնչեցրին, ինչն օգտակար է այն տեսանկյունից, որ այդ չկարգավորված հակամարտությունը գտնվում է միջազգային հանրության ուշադրության կենտրոնում։ Մենք բոլորս պետք է համառորեն աշխատենք այդ հարցում լուրջ առաջընթաց գրանցելու համար»։
Հիշեցնենք, որ դրանից առաջ էլ Մամեդյարովն ԱՄՆ-ում Ղարաբաղի հարցը քննարկել էր ՄԱԿ-ի գլխավոր քարտուղար Բան Կի Մունի, համաշխարհային մամուլի ու վերլուծաբանների, ինչպես նաև ԵԱՀԿ Մինսկի խմբի համանախագահ Ռոբերտ Բրադտկեի հետ։
