Աշնանը ԵՄ-ի հետ նոր փաստաթղթի ստորագրման հետ կապված մտահոգություններ կան։ Այդ մասին «Առաջին լրատվական»-ի հետ զրույցում նշել է «Ծառուկյան» խմբակցության պատգամավոր Լուիզա Սարգսյանը։ Դիտարկմանը, որ Հայաստանը վերջին պահին հրաժարվեց մասնակցել Վրաստանում ՆԱՏՕ-ի զորավարժություններին, արդյո՞ք մտավախություն չկա, որ աշնանը նույնը տեղի կունենա նաև ԵՄ-ի հետ նոր համաձայնագրի ստորագրման ժամանակ, և Հայաստանի իշխանությունը կրկին մի գիշերում կփոխի իր դիրքորոշումը ու չի ստորագրի համաձայնագիրը, Լուիզա Սարգսյանն արձագանքեց. «Մտահոգություններ միշտ էլ կան, այս հարցը բարձրացվել էր դեռ ամռանը, երբ ԱԺ հանձնաժողովները հանդիպում էին, բայց դեռևս ոչ մի խոչընդոտ ստորագրվելիք համաձայնագրի հետ կապված չկա։ Սակայն մտահոգությունը կա, քանի որ մեկ անգամ մենք ունեցել ենք այդ ընթացքը, բայց նաև հույս կա, որ այս անգամ դրական լուծում կստանա»։
Անդրադառնալով հարցին, թե որտե՞ղ է տեսնում Հայաստանի ապագան, արդյո՞ք կողմ է ԵՏՄ-ից դուրս գալու «Ելք»-ի առաջարկին, նա պատասխանեց. «Ես կարծում եմ, որ Հայաստանն, առաջին հերթին պետք է լինի պետականամետ, մենք առաջին հերթին պետք է տեսնենք մեր պետության շահերից բխող բոլոր խնդիրները։ Ես չեմ կարծում, որ մի կառույցից դուրս գալը և չունենալ կոնկրետ չափորոշիչներ և հաստատագրված պայծառ ապագա մյուս կառույցում՝ ամենակարևոր խնդիրը դա չէ, խնդիրն այն է, որ հասկանանք, թե որ կառույցում ինչ դիրքորոշում ունենք, և որ կառույցն է բերում մեզ ավելի դրական կյանքի, մեր շահերի, մեր պետության ու քաղաքացիների համար, որ չլսենք արտագաղթի այսպիսի թվեր»։
