Ռուսաստանի Կրասնոդարի երկրամասից նկարիչ Լուսինե Ջանյանը, ով իր նկարներով և ցուցանակներով աջակցել է Pussy Riot պանկ խմբին, հեռացրել են Կրասնոդարի մշակույթի և արվեստի համալսարանից, որտեղ նա աշխատել է շուրջ 10 տարի և արգելում են նրա ցուցահանդեսները, հաղորդում է Mk.ru-ն:
Կինը թերթիկներ և պաստառներ է նկարում ի զորակցություն Pussy Riot-ի անդամ Նադեժդա Տոլոկոննիկովայի և դրանք բաժանում է անցորդներին:
«Յուրաքանչյուր ցուցահանդես կամ ակցիա ես դրել եմ իմ անձնական բլոգում: Հաջակցություն Pussy Riot-ի աշխատանքները ցուցադրվել են Մարատ Գելմանի ժամանակակից արվեստի թանգարանում»,- ասել է Ջանյանը և հավելել, որ այդ ամենն աննկատ չի մնացել:
Նա նշել է, որ բուհի ղեկավարությունը պահանջել է, որպեսզի ինքը դադարեցնի իր գործունեությունը: «Բղավում էին, սպառնում, ասում այն մասին, որ ես զբաղվում եմ ծայրահեղականությամբ, որ դա կարող է բացասաբար ազդել ուսանողների վրա: Ժողովների ժամանակ նրանք փորձել են դատապարտել իմ արվեստը և ասել են, որ ես Պուտինին տգեղ եմ նկարում, և որ ես ուղղափառության թշնամի եմ, քանի որ քարոզում եմ Pussy Riot»,- ասել է նա:
Այս ամենի արդյունքում սեպտեմբերի 24-ին նրան հեռացրին աշխատանքից:
Լուսինե Ջանյանի ցուցահանդեսները բացվել են Կրասնոդարում, Սոչիում, Մոսկվայում, Նովոռոսիյսկում: Նրա աշխատանքները ցուցադրվել են Մոսկվայի ժամանակակից արվեստի թանգարանում, Գեղարվեստի ռուսական ակադեմիայում և այլն: