Այսօր Հայաստանի ամերիկյան համալսարանում տեղի ունեցավ «Համայնքային զարգացման ուղիներ. քաղաքացիական երկխոսություն և մասնակցային կառավարում» համաժողովը, որի ընթացքում ազդարարվեց Քաունթերփարթ ինթերնեշնլի հայաստանյան ներկայացուցչության կողմից իրականացվող «Քաղաքացիական հասարակության և տեղական ինքնակառավարման աջակցության» քառամյա ծրագրի շրջանակներում համայնքային զարգացման աշխատանքների մեկնարկը, որն իրականացվում է Ամերիկայի Միացյալ Նահանգների Միջազգային զարգացման գործակալության (ԱՄՆ ՄԶԳ) աջակցությամբ:
Համագործակցության համար ընտրվել են 43 գործընկեր համայնքներ: Ծրագրի աջակցությունը համայնքի գործունեության պլանավորման և համայնքային զարգացման ծրագրերի մշակման գործընթացում ելակետային նշանակություն կունենան տեղական ինքնակառավարման մարմինների, քաղաքացիական հասարակության և քաղաքացիների միջև ավելի լայն համագործակցություն ծավալելու գործում: Ծրագրում ընդգրկվել են հիմնականում այն համայնքները, որոնք ցուցաբերել են համագործակցության մեծ պատրաստակամություն ու հստակ քաղաքական կամք:
Քաունթերփարթ ինթերնեշնլի հայաստանյան ներկայացուցչության տնօրեն Ալեքս Սարդարը, ՀՀ փոխվարչապես, Տարածքային կառավարման նախարար Արմեն Գևորգյանը և ԱՄՆ ՄԶԳ առաքելության ղեկավար Ջաթինդեր Չիման ողջունեցին համաժողովի մասնակիցներին:
Փոխվարչապետ Արմեն Գևորգյանը, կարևորելով Քաունթերփարթի կողմից իրականացվող ծրագիրը նշեց, որ կան խնդիրներ, որոնց լուծումը երաշխիք է հանդիսանում ՏԻՄ հետագա ավելի խորը և ավելի ընդարձակ զարգացման համար: Առաջին հերթին դա վարչատարածքային հիմնախնդիրների լուծումն է: Միաժամանակ նա կարևորեց համայնքների ֆինանսատնտեսական կարողությունների հզորացումը, որն էլ քառամյա ծրագրի նպատակներից մեկն է:
Տիկին Չիմայի խոսքով, առանց ՏԻՄ-երի մասնակցության որևէ երկիր չի կարող զարգացում ունենալ և ժողովրդավարություն հաստատել. «Այս ծրագրով կօգնենք նվազեցնել այն անջրպետը, որ գոյություն ունի խոշոր քաղաքների և գյուղական համայնքների միջևե:
Ալեքս Սարդարը հավաստիացրեց, որ ծրագրի սկիզբը բավականին խոստումնալից է ապագա հաջողության համար և իր խոսքն ամփոփեց ժողովրդական ասույթով. «Երկար է խրատների ուղին, սակայն կարճ է օրինակի ճանապարհը: Ուստի բոլորս օրինակելի պետք է լինենք մեր համայնքների համար»:
Ողջույնի խոսքից հետո, ընտրված 43 համայնքների հետ հանդիսավորությամբ ստորագրվեցին համագործակցության հուշագրեր:
Պաշտոնական մասի ավարտից հետո համաժողովի մասնակիցները աշխատանքը շարունակեցին հետևյալ թեմատիկ խմբերում.
1. Միջհամայնքային համագործակցությունը Հայաստանում և դրա հեռանկարները,
2. Ապակենտրոնացում. տեղական ինքնակառավարումը Հայաստանում 15 տարի անց` մարտահրավերներ և հնարավորություններ,
3. Համայնքային զարգացման ուղիներ:
Աշխատանքների ավարտին բոլոր խմբերը, որոնցում ընդգրկված էին համայնքապետեր, ավագանու անդամներ, ակտիվ քաղաքացիական խմբերի և տեղական ՀԿ-ների, միջհամայնքային միավորումների, պետական մարմինների, դոնոր կազմակերպությունների ներկայացուցիչներ, ներկայացրեցին իրենց քննարկումների արդյունքները, որոնք հաշվի կառնվեն համայնքների հետ հետագա աշխատանքների ընթացքում:
