Թուրքիայի նախագահ Ռեջեփ Թայիփ Էրդողանը քննադատել է ԱՄՆ իշխանություններին Էրդողանի 15 թիկնապահների դեմ մեղադրանք առաջադրելու համար՝ անվանելով դա սկանդալ։ Այս մասին հայտնում է Sozcu թերթը։ Հիշեցնենք, որ ԱՄՆ իշխանությունները թուրքական անվտանգության ծառայության աշխատակիցների դեմ մեղադրանք էին առաջադրել՝ մայիսին Էրդողանի Վաշինգտոն կատարած այցի ժամանակ ցուցարարների հետ ընդհարվելու համար։
«Թե ինչպես է աշխատում ԱՄՆ-ում արդարադատությունը՝ իսկական սկանդալ է։ ԱՄՆ-ը պատասխանատվություն է կրում հյուրերի անվտանգության համար։ Եթե նրանք իրենց պարտականությունները չեն կատարում, ապա PKK-ի անդամների հարձակման դեպքում իմ թիկնազորը չպե՞տք է կատարեր իր պարտականությունները»,-ասել է Էրդողանը լրագրողներին Ստամբուլում՝ ուրբաթօրյա նամազից հետո։
Նա նաև մեղադրել է ԱՄՆ իշխանություններին նրանում, որ նրանք աջակցություն են ցուցաբերում Ֆեթուլահ Գյուլենի կազմակերպությանը։
«Ինձ համար դժվար է հասկանալ, թե ինչի է ցանկանում հասնել Ամերիկան իր այդ գործողություններով։ ԱՄՆ կատարելիք իմ հաջորդ այցի ընթացքում, եթե հնարավորություն լինի, նախագահ Դոնալդ Թրամփի հետ այդ մասին կզրուցենք»,-ասել է Էրդողանը։
