Այսօր Գյումրիում սպասում են Հայաստանի վարչապետ Կարեն Կարապետյանին, ով մարզային հերթական դռնփակ խորհրդակցությունն է անցկացնելու հանրապետության երկրորդ քաղաքում` իր վուլգար հայերենով խրախուսելով կամ նախատելով այս անգամ Շիրակի մարզի պատասխանատուներին, համայնքապետերին:
Վարչապետի մարզային այցերը, նրա ցուցադրական խիստ կեցվածքը, խոստումները վերածվել են իսկական զավեշտի, որովհետև տեղի են ունենում Կարեն Կարապետյանի և նրա կառավարության քաղաքականության կատարյալ ֆիասկոյի, ձախողման ֆոնին: Ընդ որում` հենց Կարապետյանի ամրագրած չափանիշների, հնչեցրած նախընտրական խոստումների ֆոնին:
Կասկածից վեր է, որ վարչապետն այսօր Գյումրիում տալու է հերթական խոստումները` գուցե 2018-ի, անգամ առաջիկա մի քանի տարիների կտրվածքով` խզելով կապն իրականության, ադեկվատության հետ: Նույնիսկ պաշտոնական թվերն ու մարզային պաշտոնյաները փաստում են, որ Շիրակի մարզում առայժմ իրականություն չի դարձել Կարեն Կարապետյանի ոչ մի խոստում, կառավարության որևէ ծրագիր:
Մարզպետ Արթուր Խաչատրյանը կայքերից մեկին տված հարցազրույցում խոստովանել է, որ մոտ տասը ծրագիր է ներկայացվել անցյալ տարվանից և տարվա սկզբից՝ 1,5 մլրդ դրամ ընդհանուր ծավալով, սակայն փաստացի ֆինանսավորում որևէ ծրագիր չի ստացել: Սա է մեր «կրեատիվ», «առաջադիմական» վարչապետի խոստումների, քաղաքականության գինը ու չնայած` մարդկանց աղքատությանն ու թշվառությանը, Շիրակի աղետալի վիճակին, կասկածից վեր է, որ այսօր Գյումրիում Կարապետյանը հերթական անգամ խոսելու է իրականացվող քաղաքականության արդյունավետության մասին, Գյումրին համեմատելու է եվրոպական տնտեսական կենտրոններից մեկի հետ` նախատելով տեղական անբան պաշտոնյաներին անտաղանդության և զարգացման տեսլականը չպատկերացնելու համար:
Կարեն Կարապետյանն` իր նախընտրական խոստումներում և կառավարության ծրագրերում, խոստացել է, որ այս տարի տնտեսությունում 800 մլն դոլարի ներդրումներ պետք է լինեն: Դա կազմում է մոտ 400 մլրդ դրամ: Ճակատագրի հեգնանքով հենց երեկ Ազգային վիճակագրական ծառայությունը ներկայացրել է առաջին կիսամյակի ամփոփ ցուցանիշները: Այս տարվա առաջին կիսամյակում, նախորդ տարվա նույն ժամանակահատվածի համեմատ, Հայաստանում կատարված օտարերկրյա ներդրումների ծավալները նվազել են:
Առաջին կիսամյակում տնտեսության իրական հատվածում օտարերկրյա ներդրումների զուտ հոսքերի ծավալը (առանց պետական կառավարման և բանկային համակարգով ստացվածի) կազմել է – 24 մլրդ 813.9 մլն դրամ, որից ուղղակի ներդրումների ծավալը կազմել է 17 մլրդ 267.7 մլն դրամ: Համեմատեք 17 մլրդ դոլարը Կարեն Կարապետյանի խոստացած 400 մլրդ դրամի, լավ` կիսամյակի կտրվածքով, դրա կեսի հետ ու կառավարության ֆիասկոն կդառնա ակնհայտ:
Համոզված ենք, որ նույն տրամաբանությամբ միֆ են կառավարության պնդումները տնտեսության աճի, ակտիվության մասին: Նման խայտառակ պատկեր չի եղել անգամ Հովիկ Աբրահամյանի վարչապետության շրջանում, երբ նրա կառավարությունն ուղղակիորեն կապվում էր քրեաօլիգարխիայի հետ: Էլ չենք խոսում Տիգրան Սարգսյանի կառավարության մասին, որի առջև Սերժ Սարգսյանը դրել էր կոնկրետ խնդիրներ, սահմանել էր գործունեության գնահատման հստակ չափանիշներ:
Կարեն Կարապետյանը պետք է հրաժարական տա կամ պաշտոնանկ արվի հենց իր ծրագիրը տապալելու համար, որովհետև նրա կառավարության գործունեությունը չի դիմանում քննադատության` որևէ չափանիշով:
