Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագիրը Երեւանի շենքերի ջերմային մեկուսացման միջոցով կապահովի 50-60 տոկոս էներգախնայողություն: Կլիմայի կանաչ հիմնադրամի կողմից ֆինանսավորվող եւ ՄԱԿ-ի զարգացման ծրագրի կողմից իրականացվող նախագիծը միտված է նպաստելու ջերմոցային գազերի արտանետումների նվազեցմանը:
ՀՀ բնապահպանության նախարար Արծվիկ Մինասյանը ծրագրի քննարկմանը նվիրված աշխատաժողովին ասաց, որ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրում յուրաքանչյուրս ունենք մեծ պատասխանատվություն, եւ ամեն մեկս պետք է ստանձնենք բնապահպանության նախարարի պարտականությունը: «Յուրաքանչյուր երկրի առաջընթացի հիմքը բարելավված շրջակա միջավայրն է, պաշտպանված կենսաբազմազանությունը, որտեղ էկոլոգիական հիմնախնդիրները լուծվում են ապագա զարգացումների սկզբունքի հիման վրա»,-ասաց նա:
Երեւանի փոխքաղաքապետ Կամո Արեյանի խոսքով` ծրագրում հիմնականում հասարակական շենքերն են ներառված, որոնք նախորդ դարի նորմատիվներով են կառուցված, եւ որոնք կանգնած են էներգախնայողականության խնդրի առջեւ: «Մեզնից կախված է մի բան. կատարել շենքերի ճիշտ ընտրություն»,-ասաց նա:
«Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագիրը, որպես գլոբալ բնապահպանական նշանակություն ունեցող ծրագիր, հանդես է գալիս որպես ՄԱԿ-ի «Կլիմայի փոփոխության մասին» շրջանակային կոնվենցիայի կատարման ֆինանսական մեխանիզմ: Ծրագիրը Կլիմայի կանաչ հիմնադրամի կողմից աշխարհում ֆինանսավորված 10-րդն է, իսկ եվրոպական տարածաշրջանում` առաջինը:
Վեց տարի տեւողությամբ ծրագրի համար ԿԿՀ-ն տրամադրել է 20 միլիոն ԱՄՆ դոլար դրամաշնորհային միջոցներ:
