Իրաքյան Քիրկուկ նահանգը կմասնակցի Քրդստանի անկախության հարցով հանրաքվեին։ Այս մասին հայտնում է Reuters գործակալությունը։
Համապատասխան որոշումը, ինչպես հայտարարել է նահանգապետ Նաջմուդին Քարիմը, ընդունել է նահանգային խորհուրդը։ Գործակալությունը հիշեցնում է, որ նահանգում ապրում են մեծ թվով արաբներ ու թուրքմեններ, և հանրաքվեին մասնակցելու մասին որոշումը կարող է հանգեցնել միջէթնիկական լարվածության աճի։
Նավթով հարուստ Քիրկուկ նահանգը վիճելի տարածաշրջան է։ Իրաքյան Քրդստանի իշխանությունները փաստացի վերահսկում են դրա տարածքը և համարում այն քրդական հող, մինչդեռ պաշտոնական Բաղդադը հաստատում է, որ Քիրկուկը երբեք չի մտել Քրդստանի կազմի մեջ։ Էրբիլի իշխանություններն ավելի վաղ հայտարարել էին, որ հանրաքվեին մասնակցելու որոշումը պետք է ընդունի տարածաշրջանային խորհուրդը։
Հանրաքվեն, որի անցկացումը նշանակված է սեպտեմբերի 25-ին, իրաքյան իշխանությունները համարում են ոչ սահմանադրական։
