Ադրբեջանական APA լրատվական գործակալության փոխանցմամբ՝ Ադրբեջանը չի պատրաստվում սահամափակվել մեկ արբանյակի արձակմամբ։ Այս մասին հայտարարել է Ադրբեջանի կապի ու տեղեկատվական տեխնոլոգիաների փոխնախարար Էլմիր Վելիզադեն։
Ադրբեջանը պլանավորում է տիեզերք արձակել նաև երկրորդ արբանյակը, ինչը տեղի է ունենալու 2012 թվականի վերջին կայանալիք առաջին արբանյակը տիեզերք արձակելուց հետո։
Վելիզադեն նշել է, որ ներկայումս Ադրբեջանում գործունեություն են ծավալել ամերիկյան մի շարք ընկերություններ, որոնք մասնակցում են ադրբեջանական առաջին արբանյակի տիեզերք արձակման գործին։
Հիշեցնենք, որ ադրբեջանական Azerspace (առաջին) արբանյակի նախագիծը գնահատվում է 120 միլիոն դոլար, որի 85 տոկոսն ադրբեջանական կողմին տրամադրելու է ԱՄՆ պաշտոնական վարկային գործակալություն հանդիսացող Ex-Im բանկը, իսկ մնացած 15 տոկոսը հատկացվելու է Ադրբեջանի պետբյուջեից։
Հայկական կողմը մտահոգված է, որ այդ արբանյակը կարող է գործածվել նաև ռազմական նպատակներով։
