ՀՀ փոխվարչապետ, տարածքային կառավարման նախարար Արմեն Գևորգյանն այսօր մասնակցել է «Համայնքային զարգացման ուղիներ. քաղաքացիական երկխոսություն և մասնակցային կառավարում» համաժողովի աշխատանքներին, որով ազդարարվում է Հայաստանում «Քաղաքացիական հասարակության և տեղական ինքնակառավարման աջակցության ծրագրի» մեկնարկը: Այս մասին ասվում է տարածքային կառավարման նախարարության տարածած հաղորդագրությունում։
Ծրագիրն իրականացնում է «Քաունթերփարթ ինթերնեշնլ» կազմակերպությունը՝ ԱՄՆ Միջազգային զարգացման գործակալության (ՄԶԳ) ֆինանսավորմամբ: Փոխվարչապետն ասել է, որ ծրագիրը համայնքներին աջակցում է հետևյալ ուղղություններում՝ ՏԻՄ-երի և քաղաքացիական հասարակության համագործակցության խորացում, քաղաքացիական մասնակցության խրախուսում ՏԻՄ աշխատանքներում, համայնքների ֆինանսական ինքնուրույնության աջակցություն, որոնք կնպաստեն համայնքների կարողությունների հզորացմանը: Ըստ նախարարի՝ այս ուղղություններն առաջնային են նաև ՀՀ կառավարության համար:
Համաժողովի ընթացքում համագործակցության հուշագիր է ստորագրվել «Քաունթերփարթ ինթերնեշնլ» կազմակերպության և ծրագրի շահառու 43 համայնքների միջև: Կազմակերպվել էին նաև աշխատանքային քննարկումներ՝ «Համայնքների զարգացման խնդիրներն ու հեռանկարները», «Միջհամայնքային միությունների հետ համագործակցության խնդիրներն ու հեռանկարները», «Ապակենտրոնացում. տեղական ինքնակառավարումը 15 տարի անց՝ մարտահրավերներ և հնարավորություններ» թեմաներով:
Համաժողովին մասնակցել են ՄԶԳ հայաստանյան գրասենյակի ղեկավար Չիմա Ջեթինդերը, «Քաունթերփարթ ինթերնեշնլ» կազմակերպության տնօրեն Ալեքս Սարդարը:
