«Առաջին լրատվական»-ի զրուցակիցն է քաղաքագետ Գագիկ Համբարյանը։
-Պարոն Համբարյան , լրանում է վարչապետի պաշտոնավարման մեկ տարին։ Ընդհանուր առմամբ ինչպե՞ս կգնահատեք իր աշխատանքը, ինչու՞ նախկին վարչապետերի օրինակով չկա քաղաքական մակարդակով դժգոհություն՝ նաև Կարեն Կարապետյանից։
–Ես բավարար կգնահատեի Կարեն Կարապետյանի մեկ տարվա կատարած աշխատանքը։Բայց հասարակության հույսերը չիրականացան, ինչն ունի և՛ օբյեկտիվ, և՛ սուբյեկտիվ պատճառներ։ Օբյեկտիվ պատճառներից մեկն այն է , որ Հայաստանն իրոք ծայրահեղ ծանր պայմաններում անցավ Կարեն Կարապետյանին։ Այսինքն վարչապետը ժառանգել է ծանր Հայաստան , իսկ սուբյեկտիվ պատճառն էլ մենաշնորհը, հովանավորչությունն է , յուրայինները, որոնք միլիարդավոր դրամներ չեն մուծում պետական բյուջե։
Բացի այդ՝ պետք է նշեմ, որ հասարակությունը այլ ակնկալիքներ ուներ, հասարակությունը կարող է որևիցե վարչապետի գործունեություն դրական գնահատել, եթե իր մաշկի վրա դրական փոփոխություն զգա։ Հասարակությունը երկար տարիներ կերակրվել է սին , կեղծ ու շինծու թվերով՝ Տիգրան Սարգսյանից սկսած, Հովիկ Աբրահամյանով վերջացրած։ Ստել են, թե տնտեսական աճ է գրանցվում, կա դրական դինամիկա, բայց հարցն այն էր, որ ոչ մի աճ էլ չկար՝ հակառակը հետ էինք գնում, իսկ հասարակությունն ավելի աղքատանում էր։ Սրա հետևանքով էլ կտրուկ աճեցին արտագաղթի տեմպերը։
Երևի Կարեն Կարապետյանը այն եզակի գործիչներից է ՀՀԿ-ի մեջ, որը քիչ թե շատ վայելում է հասարակության հավանությունը։ ՀՀԿ-ի վերնախավը բավական չսիրված է ժողովրդի կողմից և սրանով է պայմանավորված այն հանգամանքը, որ հասարակությունը մի փոքր հույս է կապել Կարապետյանի հետ և փորձում է չհուսալքվել։Ժողովրդի կյանքում շոշափելի դրական տեղաշարժ չի եղել Կարապետյանի գալու հետ կապված՝ ո՛չ թոշակներն են բարձրացել, ո՛չ կյանքն է լավացել։ Գործատուները փորձում են ամեն մեթոդ կիրառելով կրճատել մարդկանց աշխատավարձերը։ Պետք է նշեմ, որ հասարակության համար այլ թեկնածու էլ չկա, խնդիրն այն է՝ լավ հանեցին Կարեն Կարապետյանին, ո՞վ է գալու տեղը․ սարսափելի կադրային քաղց կա, եղած գործիչների մեծամասնությունը կամ պախարակված է, կամ իշխանությունների հետ առնչության պատճառով չսիրված։
-Ինչո՞ւ ըստ Ձեզ ընդդիմությունը չի ձևակերպում կառավարության, վարչապետի հրաժարականի պահանջ։ Չէ՞ որ նախկինում մենք սրա ականատեսը եղել ենք։
–Ես հենց դա էի նշում՝ լավ Կարեն Կարապետյանին հանեցիք, ո՞վ է գալու նրա փոխարեն, ես ոչ մեկին չեմ տեսնում անկեղծ ասած։ Ոչ մի վարչապետացու չկա։Սկանդալների մեջ թաղված գործիչներն են ՀՀԿ-ի կադրային ռեսուրսը, իսկ ՀՀԿ-ի երիտասարդության 90 տոկսոը կարիերիստներ են։
-Արդեն 2018 թվականին ընդդիմությունն ի՞նչ դերակատարություն կունենա վարչապետ նշանակելու հարցում։Կլինի՞ ըստ ձեզ աջակցություն վարչապետին՝ միայն այն բանի համար, որ Սարգսյանը հեռանա։
-Ես ընդդիմության հարց այստեղ չեմ տեսնում, մեր ընդդիմությունը բավականին թույլ է, իսկ խորհրդարանի ուժերը ոչրևէ հարց չեն լուծում։ Խնդիրը հասարակությունն է, դուք լավ գիտեք, որ վերջին տարիներին հասարակությանը վերաբերող սոցիալ-տնտեսական հարցերը լուծվել են ոչ թե Ազգային ժողովում կամ քաղաքական դաշտում ակտիվ կուսակցությունները, այլ քաղաքացիական ակտիվիստներն ու հասարակական կազմակերպությունները։ Ընդդիմությունը լուսանքներում է հայտնվել։ Կարեն Կարապետյան- Սերժ Սարգսյան անդրկուլիսյան պայքարում իրենց դերակատարումը կարող են ունենալ քաղաքացիական հասարակության ելույթները։ Նույն «Ելքը» կամ ԲՀԿ-ն որևէ ազդեցություն չեն ունենա այս առումով, նրանց ելույթները վարչապետի հետ կապված որևէ ազդեցություն ունենալ չեն կարող։
