1963 թ. արտադրված Ferrari 250 GTO-ն ավտոմեքենաներ հավաքող հայտնի ամերիկացի Փոլ Պապալարադոյի կողմից վաճառվել է 52 միլիոն դոլարով: Գնորդի անունը և բնակության վայրը չի հրապարակվում, տեղեկացնում է Autoblog պորտալը:
Ինքը՝ Պապալարադոն այս կապակցությամբ տեղեկություններ չի տվել:
«Ես նման գործարքները չեմ մեկնաբանում: Բացի այդ, քանի որ խոսքը մասնավոր գործարքի մասին է, դժվար թե ԶԼՄ-ներում ճշգրիտ արժեքը նշվի: Սակայն պետք է ասեմ, որ այն անցել է 2012 թ. ապրիլին սահմանված ռեկորդից, երբ Ferrari 250 GTO-ն վաճառվեց 35 միլիոն դոլարով»,- նշել է նա:
Սպորտային այս ավտոմեքենան թողարկվել է ընդամենը 39 օրինակով և հանրահայտ է դարձել այն պատճառով, որ ստեղծվել է հատուկ բրիտանացի ավտոարշավող Սթրիլինգ Մոսսի համար: Սակայն Մոսսը 1962 թ. վթարից հետո այդպես էլ այդ մեքենայով մրցարշավների չի մասնակցել:
Դրանից բացի, ֆրանսիացի Ժան Գիշեն Tour de France 1963-ը հաղթել է հենց Ferrari 250 GTO-ով:
