Օգոստոսին գները բարձրացել են 0.3%-ով, այն դեպքում երբ անցած տարվա նույն ժամանակում գները իջել էին 0.4%-ով: Իսկ 12-ամսյա գնաճը սեպտեմբերի վերջին կազմել է 9.3%: Օգոստոսի գնաճը պայմանավորված է հիմնականում ծառայությունների թանկացմամբ՝ 2.6%-ով, որն էլ իր հերթին պայմանավորված է կոմունալ ծառայությունների գների բարձրացմամբ՝ 6 տոկոսով:
Գնաճն առաջիկայում կնվազի, սրանում համոզված է Կենտրոնական բանկի խորհուրդը:
Երրորդ եռամսյակում հումքային և պարենային հիմնական ապրանքները միջազգային շուկաներում էժանացել են: Պարենի և գյուղատնտեսության կազմակերպության (FAO) հրապարակված տվյալով գները նվազել են 1.9%-ով: Կարմրահատ ցորենի ԱՄՆ-ից արտահանման գինը 3-րդ եռամսյակում՝ 2-րդի համեմատ նվազել է 2.6%-ով, իսկ New York Board-Intercontinental Exchange բորսայում գնանշվող անմշակ շաքարավազի գինն իջել է 2.6%-ով:
Սակայն միաժամանակ Intercontinental Exchange բորսայում Brent տեսակի հում նավթի մեկ բարելի միջին գինը նախորդ եռամսյակի նկատմամբ աճել է 6.9%-ով, իսկ պղնձի գինը Լոնդոնի ֆոնդային բորսայում նվազել է 1.1%-ով:
Այս և այլ գործոններ գնահատելուց հետո ԿԲ խորհուրդը կարծում է, որ առաջիկայում արտաքին հատվածից գնաճի ընդլայնման ռիսկեր չեն լինի:
Առաջիկա ամիսներին 12-ամսյա գնաճը կնվազի՝ մոտենալով կանխատեսվող ցուցանիշին: Այսպիսով, կարճաժամկետ հատվածում գնաճն աստիճանաբար նվազելով կվերադառնա նպատակային մակարդակին և կպահպանվի տատանումների թույլատրելի միջակայքում, այսինքն՝ 4±1.5% միջակայքում:
Այդ դեպքում գլխավոր դրամատունը կարձագանքի և հնարավոր է նորից իջեցնի վերաֆինանսավորման տոկոսադրույքը, որն այժմ 8.5 տոկոս է: Սա այն տոկոսադրույքն է, որով ԿԲ-ն գումար է տալիս առևտրային բանկերին և դրա բարձրացումը պետք է որ զսպի գնաճը, բայց հանգեցնի նաև վարկերի տոկոսների բարձրացման:
