«ԵՏՄ-ում մենք ճանաչում ենք Ղազախստանի լիդերությունը, քանի որ Ղազախստանի նախագահն այդ գաղափարի հեղինակն է»,- ասել է Ռուսաստանի փոխվարչապետ Իգոր Շուվալովն Աստանայում ընթացող «Եվրասիական շաբաթ» միջազգային ֆորումի ժամանակ: Շուվալովը հույս է հայտնել, որ Եվրասիական միության մյուս երկրներն էլ կաջակցեն այս դիրքորոշմանը: «Մենք բոլորս Նուրսուլթան Նազարբաևին դիտում ենք եվրասիական գործընկերության այս արժեքի լիդեր»:
Վերջերս էլ Ռուսաստանը Ղազախստանին էր հանձնել սահմանամերձ մի լճի նկատմամբ վերահսկողությունը: Փորձագետները կարծում են, որ Մոսկվան զգուշանում է Նազարբաևի ինչ-որ գործողությունից և այս քայլերով փորձում է սիրաշահել Ղազախստանի փորձառու առաջնորդին: Բելառուսն ու Ղազախստանը սովորաբար դիմում են շանտաժի լեզվին, երբ խնդիրներ են ունենում Մոսկվայի հետ, և վերջինս, որպես կանոն, տեղի է տալիս նրանց պահանջներին, որովհետև Կրեմլի ինտեգրացիոն նախագծերն ամբողջովին կիմաստազրկվեն, եթե Բելառուսը կամ Ղազախստանը դադարեցնեն դրանց իրենց մասնակցությունը:
Մյուս կողմից՝ շատ հնարավոր է, որ Շուվալովի հայտարարությունը պետք է դիտարկել ոչ թե ռուս-ղազախական հարաբերությունների, այլ ավելի լայն համատեքստում: Արևմտյան պատժամիջոցների հետևանքով Ռուսաստանի տնտեսությունն աննախադեպ ճգնաժամ է ապրում, որի պիկը դեռ առջևում է: Չի բացառվում, որ Մոսկվան որոշել է ձեռքերը լվալ ծախսատար ինտեգրացիոն նախագծերից՝ մանավանդ դրանք բացառապես ծառայում են Կրեմլի կայսերական հռետորաբանությանը՝ գործնական որևէ օգուտ չտալով Ռուսաստանին:
Ամբողջ խնդիրն այն է, որ ԵՏՄ-ն այնքան չկայացած կառույց է, որ Աստանան հազիվ թե խանդավառությամբ ընդունի Մոսկվայի «նվերը»:
Լուսանկարը՝ armeniasputnik.am-ի