Грузия Online-ի փոխանցմամբ՝ այսուհետ Թբիլիսիի փողոցներն աղտոտող քաղաքացիները կարող են հայտնվել ոստիկանատանը, եթե նրանց մոտ չհայտնաբերվի անձը հաստատող փաստաթուղթ։ Համապատասխան փոփոխությունները կներառվեն Վարչական իրավախախտումների օրենսգրքում։
Դրանում կհայտնվի նոր հոդված, որում քաղաքի աղտոտման համար նախատեսված տուգանքի չափը կմնա նույնը։ Այսուհետ փողոցում աղբ նետելու համար հետիոտները և շինարարական աղբի թափման կանոնները խախտողները կարող են հայտնվել ոստիկանատանը, եթե ապօրինի գործողություն կատարելիս նրանց մոտ չհայտնաբերվեն անձը հաստատող փաստաթղթեր, կամ էլ չլինեն վկաներ, որոնք կարող են հաստատել նրանց անձը։
Ոստիկանատանը կարող են հայտնվել նաև այն անձինք, ովքեր կյուրացնեն պետության տիրույթում գտնվող հողատարածքները, կխախտեն մետրոպոլիտենից օգտվելու կանոնները, ավտոկայանատեղիներում կանգառելու կանոնները, առանց տոմս երթևեկողները և այլք։
Հիշեցնենք, որ 2010 թվականի դեկտեմբերին ընդունված ուղղումներով՝ փողոցներն աղտոտող անձինք տուգանվելու էին մոտ 28 դոլարով, իսկ իրավաբանական անձինք՝ 113 դոլարով։ Ընդ որում, ավտոբուսներից ու երթուղային տաքսիներից փողոց աղբ նետելու դեպքում տուգանվելու էին հենց աղբ նետող ուղևորները։ Վարորդները պատասխանատվություն չէին կրելու նրանց այդ գործողությունների դիմաց։
