ՀԱԿ խմբակցության քարտուղար Արամ Մանուկյանին մտահոգում է Հայաստանի համար ամենակարևոր թեմաներից մեկը՝ գազի գինը: Հոկտեմբերի 4-ին ԱԺ ճեպազրույցների ժամանակ Մանուկյանը նշեց, որ մինչ այս պահը չգիտի՝ ինչ է կատարվել, կատարվում և կատարվելու:
«Իմ հարցը չորս անգամ հնչել է պառլամենտում՝ երեք անգամ հարցումների ձևով, մեկ անգամ՝ փակ նիստում: Չորսի ժամանակ էլ ես հստակ խոսել եմ գազի գնի մասին, մինչ այս պահը որևէ պատասխան հստակ չունեմ: Վարչապետի՝ իմ հարցին պատասխանելուց հետո շատերը, այդ թվում և ես, մտածեցինք՝ գուցե շփոթել է գազի գնի պայմանագիրը Մաքսային միության հետ, բայց իմ հարցը առաջին անգամ չէր հնչում»,- ասաց նա:
Ա.Մանուկյանը նշեց, որ բոլոր հին սղագրությունները հանել է, տեսել՝ ստացված բոլոր պատասխանները մերժողական, բացասական կամ դրական չեն, այլ խուսափողական. չեմ հիշում, չգիտեմ, երևի, գուցե և այլն: ՀԱԿ անդամի խոսքով՝ ասում են՝ գազի գնի վերաբերյալ պայմանագիր չկա, սակայն անհավատալի է՝ ինչպե՞ս կարող է պայմանագիր չլինել, երբ այդ հարցն այնքան է վուլգարացվել, որ անգամ գյուղացին հարևանից կոշիկ գնելու դեպքում փաստաթուղթ է ստորագրում, ուրեմն ինչպե՞ս կարող է գազի դեպքում պայմանագիր չլինել:
«Ես վարչապետի հետ առանձնազրույց ունեցա, մանրամասները չեմ նշի, սակայն կասեմ՝ նա ինձ ասաց, որ գազի գնի բարձրացումն առանց պայմանագրի է եղել: Հավատացեք՝ նա լուրջ էր, սթափ, խոսքերը հոդաբաշխ էին: Եթե նախկինում տպավորություն կար, թե հարցը սխալ է հասկացել, նա ինձ համոզեց, որ հենց այդպես էլ հասկացել է, և ներկայացնում էր՝ գազի գինն ինչպես է որոշվել»,- ասաց Ա.Մանուկյանը՝ նշելով, որ Հովիկ Աաբրահամյանն էլ զարմացավ՝ ինչպես կարող է գազի գինն առանց պայմանագրի թանկանա:
ՀԱԿ խմբակցության քարտուղարի համար հասկանալի է հետևյալը. ինչ-որ բան ստորագրված է, այն թաքցնում են, որովհետև այդ պայմանագիրը որևէ մեկը չի տեսել: Իսկ եթե կա, ուրեմն այնտեղ այնպիսի բաներ են, որ հրապարակել չի կարելի: Եթե չկա պայմանագիր, ապա, ըստ Մանուկյանի, գին են որոշել, այդ գնով ապօրինի վարձ են վերցնում ժողովրդից այսքան ժամանակ:
«Ես պայմանագիր չեմ տեսել, եթե կա, թող հրապարակեն: Այլևս կոմերցիոն գաղտնիք չեմ ընդունում: Թող փակ նիստ անեն, խորհրդարանում ներկայացնեն, հակառակ պարագայում ես կարող եմ եզրակացնել, որ ամբողջ ժողովուրդը մուծում է անում այդ չգիտեմ ինչի դիմաց»,- ասաց նա՝ հավելելով, որ լուծված չէ ո՛չ սուբսիդիայի, ո՛չ կառավարության 30 տոկոսի, ո՛չ պայմանագրի, ո՛չ հետագայի հարցը:
ՀԱԿ անդամը նշեց, որ երկու Սարգսյաններն էլ անլուրջ մարդիկ են: Նման խաղ, արկածախնդրություն մի երկրի գլխին չի կարելի. սա անլուրջ վերաբերմունք է հայ ժողովրդի հանդեպ: «Ժառանգություն» խմբակցության անդամ Զարուհի Փոստանջյանի՝ ԵԽԽՎ-ում ցուցաբերած պահվածքին Մանուկյանը հրաժարվեց անդրադառնալ՝ նշելով, որ դա նրա գործն է, իսկ իրեն ավելի լուրջ, ավելի ծանր հարցեր են հուզում: «Ես ինձ ավելի պատասխանատու եմ համարում այս երկրի ճակատագրի համար, քան Սերժ Սարգսյանը և Տիգրան Սարգսյանը միասին»,- ասաց նա:
