«Պատժամիջոցների հերթական տրանշը շատ սպասելի էր և պետք էր, քանի որ առանձին վերցրած՝ թե՛ ՌԴ-ն, թե՛ Հյուսիսային Կորեան շարունակում են ոչ ժողովրդավարական գործելակերպն իրենց քաղաքականության մեջ, որն անդրադառնում է ինչպես տնտեսական, այնպես էլ հասարակական և ռազմական քաղաքականության բնագավառում։
Պատժամիջոցների այս նոր փունջը Ռուսաստանի վրա կանդրադառնա բացասական կերպով. հիշում ենք, որ դեռևս 2014-2015թթ. պատժամիջոցների առաջին թափի հետ ռուսական ռուբլին միանգամից արժեզրկվեց գրեթե կրկնակի, բարձրացել է գործազրկության մակարդակը, խնդիրներ կան աղքատության մակարդակի հետ կապված, և հիմա տնտեսությունը գտնվում է ճահճացման փուլում, և դա կարող է բերել նաև ստագնացիայի ժամանակաշրջանի ՌԴ տնտեսության մեջ, այսինքն՝ ոչ միայն տնտեսական աճի, տնտեսական զարգացման տեմպի վրա սա կարող է վատ ձևով ազդել, այլ նաև կարող է ազդել ֆինանսական շուկայի վրա, որը Ռուսաստանի տնտեսությունը կբերի կոլապսի շեմին»,- «Առաջին լրատվական»-ի հետ զրույցում նշեց «Տնտեսական իրավունքի կենտրոն» ՀԿ նախագահ Մովսես Արիստակեսյանը՝ անդրադառնալով ԱՄՆ-ի կողմից ընդդեմ Ռուսաստանի կիրառվող նոր պատժամիջոցներին։
Նա համոզված է, որ այս պատժամիջոցներն իրենց անմիջական ազդեցությունը կունենան նաև Հայաստանի վրա՝ թե՛ քաղաքական, թե՛ տնտեսական, թե՛ սոցիալական առումով։ Արիստակեսյանի խոսքով՝ Հայաստանն անկախության տարիներից ի վեր շարունակաբար վարել է այնպիսի քաղաքականություն, որը նրան հասցրել է Ռուսաստանի վասալային կարգավիճակին։
«Մենք այսօր արդեն իսկ կորցրել ենք Անկախության հռչակագրով հռչակված մեր ինքնիշխանության մեծ մասը, որն արտահայտվել է թե՛ «Գույք՝ պարտքի դիմաց» և համանման այլ գործարքներով՝ մեր ռազմավարական նշանակության օբյեկտները սեփականության իրավունքով փոխանցելով մեր «ռազմավարական ընկերոջը», թե՛ հատկապես 2013թ.-ի սեպտեմբերի 3-ին, երբ կամովին մենք մտանք մի թիմ, որը կոչվում է ԵԱՏՄ։ Այստեղ Հայաստանը գտնվում է պարզապես Գիքորի կարգավիճակում․ ով ասես՝ հասնում է և հարված հասցնում մեզ, բայց մենք դրան պատասխանելու իրավունք և կամք չունենք»,- ընդգծեց Մովսես Արիստակեսյանը։
Վերջինիս գնահատմամբ՝ Հայաստանի քրեաօլիգարխիկ համակարգի վրա պատժամիջոցների ազդեցությունն ավելի քիչ կլինի, քան ժողովրդի վրա, քանի որ Հայաստանի տնտեսությունը հիմա չի զարգանում։
«Ես չեմ հավատում ԱՎԾ-ի այն տվյալներին, որ որոշակի աճի տեմպ կա․ չկա այդպիսի բան, մեր պետական բյուջեն դատարկ է, և մենք դեֆոլտի առաջ ենք կանգնած, իսկ բյուջեն լցնելու համար կառավարությունը դիմում է բազմաթիվ միջոցների՝ ՃՈ տուգանքներն են շատացնում, կարմիր գծեր են քաշում ու փող են կեղեքում, վարչական իրավախախտումների տարբեր տեսակներ են մոգոնում և օրենսգրքով ամրագրում, որպեսզի ժողովրդից փող քամեն, որովհետև բյուջեում տնտեսությունից փող չի գալիս։
Պատժամիջոցներն առավելապես կանդրադառնան ժողովրդի, մեր հասարակության վրա, ինչը կարտահայտվի արտագաղթի նոր ալիքով, գործազուրկների քանակի ավելացմամբ ու աղքատության մակարդակի բարձրացմամբ, այսինքն՝ չքավորներն ավելի կշատանան, իսկ կեղտոտ փողեր տնօրինող և ժողովրդին հարստահարելու արդյունքում հարստացած քրեաօլիգարխիկ համակարգի ներկայացուցիչներին պետք է ԱՄՆ-ն ու այլ երկրները ընդգրկեն հատուկ ցուցակի մեջ, որպեսզի նրանց իրենց երկիր մուտքի վիզա չտրամադրվի»,- ասաց նա։
Մանրամասները՝ տեսանյութում։
