ՆԱՏՕ-ն կարծում է, որ Ռուսաստանի կողմից Աբխազիայի և Հարավային Օսիայի պետական սահմանների կառուցումը խոչընդոտում է Վրաստանում հակամարտության կարգավորմանը: Այսօր տարածված հայտարարության մեջ Հյուսիսատլանտյան դաշինքի գլխավոր քարտուղար Անդերս Ֆոգ Ռասմուսենը հայտարարել է, որ մտահոգությամբ հետևում է ցանկապատների կառուցման Ռուսաստանի գործողություններին: Այս մասին հայտնում է ITAR-TASS-ը:
«Այդ գործողությունները հակասում են Ռուսաստանի միջազգային պարտավորություններին և չեն նպաստում հակամարտության խաղաղ լուծմանը»,- ասել է Ռասմուսենն ու հավելել, որ դրանք բացասաբար են ազդում տարածաշրջանում իրավիճակի և տեղացիների կյանքի վրա:
Ռասմուսենը կոչ է արել վերացնել այդ խոչընդոտները: ՆԱՏՕ-ի գլխավոր քարտուղարը հիշեցրել է, որ դաշինքն աջակցում է Վրաստանի տարածքային ամբողջականությանն ու ինքնիշխանությանը՝ միջազգայնորեն ճանաչված սահմաններով, և հերթական անգամ դիմել է Ռուսաստանին՝ առաջարկելով վերանայել Աբխազիայի և Հարավային Օսիայի ճանաչումը:
