«Սոցիոմետր» սոցիոլոգիական կենտրոնի ղեկավար Ահարոն Ադիբեկյանը, այսօր լրագրողների հետ հանդիպմանը խոսելով համաներումից, ասաց, որ այն ունի մի քանի նպատակ, որոնցից առաջինը երկրի իրավական կարգերի անկատարությունը հարթելն է: «Օրենքի գերակայությունը չի նշանակում, որ օրենքը կատարյալ է: Հետևաբար մեկը պետք է, որ համակարգի: Այս դեպքում նախագահն է կատարում այդ ֆունկցիան»,- ասաց նա:
Սոցիոլոգը նշեց, որ համաներման մեջ կրկնահանցագործությունները մեկ տոկոսից ավելի չեն, ուստի այն ունի հումանիտար իմաստ: Եթե մենք հրաժարվենք համաներումից, դա կնշանակի, որ մենք հետ ենք գնում բարբարոսություն:
«Անմեղության հայկական ծրագիր» ՀԿ նախագահ Զարուհի Մեջլումյանն էլ հավելեց, որ ամբողջ աշխարհում համաներումն ընդունված ձևաչափ է, շատ երկրներում այն կիրառվում է պետական և կրոնական տոներին:
Այս տարվա համաներումը, ինչպես նշեց բանախոսը, ունի առաջընթաց. «Այս համաներման մեջ ներառված են նաև ծանր հանցագործությունները: Նման մարդկանց պատժաչափը կկրճատվի վեց ամսով»:
Ըստ Զ.Մեջլումյանի, օրենքում լուրջ բաց կա, որը կոռուպցիայի պատճառ կարող է դառնալ: Նա նշեց, որ օրենքում ասվում է՝ եթե մինչև համաներման օրը բանտարկյալը տույժ է ունենում, համաներումը նրա վրա չի ազդում, այսինքն` կոռուպցիոն ռիսկերն են շատանում, քանի որ տույժ չունենալու համար հնարավոր է՝ կոռուպցիա իրականացվի բանտում:
Խոսելով բանտի բացերի մասին` նա ասաց, որ այս կառույցում պակասում է հոգեբանի աջակցությունը. հազար հոգու հետ աշխատում է մեկ հոգեբան: «Այդ հոգեբանը ուսադիրներով մարդ է, որի մոտ շատ դժվար են խոսում բանտարկյալները: Բացի դրանից` մենք չունենք վերականգնողական կենտրոններ, մարդիկ դուրս են գալիս բանտերից և չգիտեն` ինչ անել»,- ասաց նա:
