Մարդու իրավունքների եվրոպական դատարանը (ՄԻԵԴ) ապրիլի 22-ին ընդունած վճռով Ադրբեջանից պահանջել էր անմիջապես բանտից ազատ արձակել 2007թ-ին ձերբակալված հայտնի լրագրող, «Ռելանի Ազերբայջան» եւ «Գյունդալիք Ազերբայջան» թերթերի գլխավոր խմբագիր Էյնուլլա Ֆաթուլլաեւին եւ 27 հազար 882 եվրո փոխհատուցում վճարել նրան:
Սակայն ՄԻԵԴ այդ որոշումը կատարելու փոխարեն՝ Ադրբեջանի գերագույն դատարանը նրա նկատմամբ երկու դատական գործեր չեղյալ հայտարարելու հետ, ուժի մեջ է թողել իբրեւ թե հարկերից խուսափելու հիմնավորմամբ երրորդ դատական գործը, որի հիման վրա Է.Ֆաթուլլաեւի բանտարկությունը հասցվել է 2 տարի 3 ամիս ժամկետի:
Ինչպես հայտնել է «Ազադլըգ»-ը, Human Rights Watch կազմակերպության Հարավային Կովկասի գծով փորձագետ Գեորգի Գոգիան նշել է, որ Ադրբեջանի իշխանությունը պարտավոր է անմիջապես ազատ արձակել Է.Ֆաթուլլաեւին եւ վերջ դնել անարդարացի դատաքննությանը. «Հակառակը, իշխանության ներկայացուցիչները նոր կեղծ մեթոդներ են ստեղծում նրան ձերբակալության մեջ պահելու համար եւ բացահայտորեն խախտում միջազգային պարտավորությունները: Իշխանությունն այնպիսի խորամանկություններ է բանեցնում, իբրեւ կատարում է ՄԻԵԴ որոշումը: Բայց դրանով ոչ մեկի չեն կարող խաբել: Բացահայտ է, որ կեղծ մեղադրանքներով նրանք շարունակում են լռեցնել արդեն 3 տարուց ավելի բանտում գտնվող լրագրողին», -ասել է Գ.Գոգիան: Human Rights Watch-ը կոչ է արել Ադրբեջանի կառավարությանը չեղյալ հայտարարել է Է.Ֆաթուլլաեւի դեմ հարուցած բոլոր մեղադրանքները եւ անմիջապես ազատ արձակել նրան: