Երկրորդ համաշխարհային պատերազմի մի խումբ վետերաններ ներխուժել են Վաշինգտոնում գտնվող հուշահամալիր, որը փակվել է դաշնային կառավարության ֆինանսավորման սղության պատճառով: Այս մասին հայտնում է Washington Post-ը:
Վետերանները Վաշինգտոն էին ժամանել բարեգործական ծրագրի շրջանակում՝ այցելելու զինվորական հուշահամալիրներ և հիշատակի այլ վայրեր: Սակայն երեքշաբթի առավոտյան հաստատություններն ու հուշարձանները փակվել են, քանի որ Կոնգրեսը չի կարողացել ընդունել նոր ֆինանսական տարվա բյուջեն:
Երբ վետերանները եղել են Երկրորդ համաշխարհային պատերազմի հուշահամալիրի մոտ, այն շրջափակված է եղել մետաղական ցանկապատով, իսկ շատրվաններն անջատված են եղել: Սակայն վետերաններից կամ նրանց ուղեկցող անձանցից մեկը (խմբում եղել են նաև Կոնգրեսի անդամներ) մի կողմ է հրել ցանկապատը, ու պատերազմի տարեց մասնակիցները ներս են մտել՝ երկրպագելու հուշարձանը: Ոստիկանությունը չի միջամտել:
Միչիգանից հանրապետական կոնգրեսական Բիլ Հայզենգան նշել է, որ դա եղել է Վաշինգտոնում տևական ժամանակահատվածում քաղաքացիական անհնազանդության լավագույն ակցիան:
Վետերաններից մեկն ասել է, որ եթե Կոնգրեսում չեն կարողանում միասին աշխատել, ապա նրանց պետք է հեռացնել և նորերին հավաքել:
