Նյու Յորքում ընթացող ՄԱԿ-ի ԳԱ 68-րդ նստաշրջանում Միխեիլ Սաակաշվիլիի՝ հայաստանյան հանրությանն ալեկոծած ելույթը, որտեղ նա խիստ քննադատության է ենթարկել Ռուսաստանի կայսերապաշտական քաղաքականությունը, բացառապես հակառակ արձագանքներ է գտել Վրաստանում:
Ինչպես «Առաջին լրատվական»-ի հետ զրույցում ասաց Վրաստանի խորհրդարանի արտաքին հարաբերությունների հանձնաժողովի փոխնախագահ, «Վրացական երազանք» կուսակցության անդամ Գիորգի Վոլսկին, ընդհանուր առմամբ Միխեիլ Սաակաշվիլին իր ելույթով արտահայտեց ռուս-վրացական հարաբերությունների ողջ լարվածությունը, որը կուտակվել էր ռուս-վրացական պատերազմից հետո: Սակայն, ըստ նրա, Վրաստանի ներկայիս իշխանության շարքերում շատերը և նաև ինքը կարծում են, որ Սաակաշվիլին, ինչպես միշտ, չափն անցնում է և հետապնդում է PR հետաքրքրություններ:
«Բացի Վրաստանից, տարածաշրջանում այլ երկրներ կան, որոնք ունեն որոշակի ռազմավարական հարաբերություններ ՌԴ հետ, և լավ կլիներ, որ Վրաստանը ևս ֆունդամենտալ կերպով առաջ մղեր այն հարցերը, որոնց ձևաչափով բանակցություններ են ընթանում այսօր: Ուստի պետք է պրագմատիկ մոտեցում ցուցաբերել: Այսօր ՌԴ դերակատարությանը ռեգիոնում, ՌԴ շահերը չեն համապատասխանում Վրաստանի հետաքրքրություններին, այնինչ սեփական ստրատեգիական հետաքրքրությունների համար որոշակի հաջողություն գրանցելու համար Վրաստանի ղեկավարները պետք է որ ավելի պրագմատիկ վերաբերվեին ռուս-վրացական հարաբերություններին, իսկ Սաակաշվիլին հեռանում է քաղաքական դաշտից և ցանկանում է արջի անուն թողնել»,- նման տեսակետ հայտնեց Գիորգի Վոլսկին:
Անդրադառնալով Հայաստանի ընտրությանը՝ նա ասաց, որ երկրների շահերը կարող են տարբեր ուղղություններով գնալ, բայց ոչ իրար դեմ: Նրա խոսքով՝ եթե հարևաններից մեկը միանում է Եվրասիական միությանը, ապա դա չի խանգարում վրացական եվրատլանտյան զարգացման ուղուն: «Ով գիտե, միգուցե, նաև երկկողմ օգուտ հնարավոր կլինի ստանալ դրանից: Ես չեմ ցանկանում բարդություններից խոսել: Առանց բարդությունների ոչինչ չի ստացվում: Ցավոք, երկրները պետք է ինչ-որ կերպ երկխոսեն քաղաքական կենտրոնների հետ, սակայն դա չի նշանակում, որ պետք է հրաժարվել այդ հետաքրքրություններից»,- ասաց վրացի պատգամավորը:
Նշենք, որ Սաակաշվիլին հայտարարել էր. «Մի քանի տարի անց Վլադիմիր Պուտինը կհեռանա Կրեմլից, կչքանա ռուսական քաղաքականությունից: Ռուս քաղաքացիները նրան կհիշեն որպես հին ժամանակների՝ կոռուպցիայի ու ճնշման ժամանակների ուրվական: Ռուսաստանը կդադարի կայսրություն լինելուց և կդառնա նորմալ պետություն:
Ռուսաստանը շարունակում է անեքսիայի ենթարկել վրացական հողերը և դրանով իսկ թուլացնել Վրաստանը: Ռուսաստանի համար շահավետ չէ ուժեղ հետխորհրդային հանրապետություններ (Վրաստան, Ուկրաինա, Մոլդովա, Հայաստան, Ադրբեջան) ունենալը: Դուք կարծում եք՝ Պուտինը ցանկանո՞ւմ է, որ Հայաստանն առավելության հասնի Ադրբեջանի հետ հակամարտությունում: Ո՛չ: Դա Հայաստանը կդարձնի չափազանց ուժեղ և պոտենցիալ առումով բավական անկախ: Թե՞ դուք կարծում եք, որ դրա հակառակն է ճշմարտությունը, որ Մոսկվան ցանկանում է Բաքուն գերազանցության հասնի Երևանի նկատմամբ: Ո՛չ, նրանք չեն ցանկանում, որ մեկնումեկն ընդհանրապես հաղթող դուրս գա»:
