«Որքան էլ զարմանալի թվա, ես նորմալ եմ վերաբերվում այդ որոշմանը, որովհետև ես ինքս միշտ արևմտյան արժեքներն եմ գնահատել և ձգտել եմ արևմտյան արժեքներին»,- «168 ժամ» պարբերականի թղթակցի հետ զրույցում ասել է «Քրիստոնեա-ժողովրդավարական վերածնունդ» կուսակցության նախագահ Սոս Գիմիշյանը՝ խոսելով Մաքսային միություն մտնելու վերաբերյալ հայտնի հայտարարության մասին:
Նա մեղադրել է եվրոպական ղեկավարությանը, որը, իր խոսքերով, չի աջակցել Հայաստանում ժողովրդավարության և մյուս եվրոպական արժեքների արմատավորմանը, փոխարենը՝ լեգիտիմացրել է «կեղծված նախագահներին»: Սակայն գլխավոր պատճառաբանությունը, որը բերել է Ս. Գիմիշյանը, Հայաստանի՝ Մաքսային միության անդամակցությունն արդարացնելու համար, վերաբերել է «բարոյականությանը»: Նկատի ունենալով «Կանանց և տղամարդկանց հավասար իրավունքների և հավասար հնարավորությունների ապահովման մասին» օրենքը, որը, ըստ նրա, ընդունվել է եվրոպացիների պարտադրանքով, Գիմիշյանն ասել է.
«Իհարկե, մարդու իրավունքներ, իհարկե, բարեկեցություն, բայց ես ավելի ուրախ կլինեմ, որ մեր ժողովուրդը մի քիչ սոված լինի, մի քիչ վատ հագնված, բայց միանշանակ՝ բարոյական, քան թե հակառակը»:
Հոդվածն ամբողջությամբ՝ կարդացեք «168 ժամ»-ի այսօրվա համարում:
