Ադրբեջանի և ՀՀ նախագահների հանդիպումը կթուլացնի լարվածությունը կողմերի միջև, սակայն բեկում չի առաջացնի: «Առաջին լրատվական»-ի հետ զրույցում այսպիսի տեսակետ հայտնեց Մոսկվայում գործող Կովկասագետների գիտական միության նախագահ, քաղաքագետ Ալեքսանդր Կռիլովը՝ անդրադառնալով ՄԱԿ ԳԱ-ի 68-րդ նստաշրջանում քննարկվող Ադրբեջանի և ՀՀ նախագահների մակարդակով հանդիպման արդյունավետությանն ու նպատակահարմարությանը:
Նա նշեց, որ հայ-ադրբեջանական բանակցությունները, ըստ էության, ավարտված չէին, կողմերից որևէ մեկը չէր հայտարարել, որ հրաժարվում է բանակցային գործընթացից, այնպես որ՝ ինչ էլ լինի, հնարավոր հանդիպման արդյունքը դրական կլինի և կթուլացնի լարվածությունը կողմերի միջև: Բայց, նրա համոզմամբ, բեկումնային ոչինչ չպետք է ակնկալել:
«Ուստի կարևոր է, թեկուզ մանր քայլերով, բայց ընթանալ մեկ նպատակի ուղղությամբ՝ ԼՂ հակամարտության խաղաղ կարգավորման և երկկողմ ընդունելի լուծման և փոխզիջումների ուղղությամբ: Կողմերը պետք է միմյանց քայլերին ոչ այդքան կրքոտ և զգացմունքային վերաբերվեն և հասարակության շրջանում հիստերիա չբարձրացնեն ամենատարբեր պատճառներով: Մեր դիտարկումների համաձայն՝ կողմերին խոչընդոտող ամենակարևոր հանգամանքը սա է եղել»,- մեկնաբանեց կովկասագետը:
Անդրադառնալով պնդումներին, թե ՌԴ-ն, որպես հակամարտության գլխավոր խաղացող, պետք է դադարեցնի կողմերին զենք մատակարարել, քաղաքագետն ասաց՝ իհարկե, Ռուսաստանը պետք է դադարեցնի հակամարտության կողմերին զենքի մատակարարումը: Սակայն, նրա խոսքով, հարցի նման ձևակերպմանը պետք է ավելացնել հետևյալը՝ մյուս գերտերությունները պետք է ևս լծվեն այդ գործին:
«Ցավոք, դա իրատեսական չէ, և եվրոպական երկրները, ԱՄՆ-ը Իսրայելին և արաբական երկրներին են մատակարարում զենք՝ միջազգային շուկայում թելադրելով կանոններ: Այնպես որ՝ Ռուսաստանը, եթե նույնիսկ մատակարարումից հրաժարվի, վերանայի իր հարաբերությունները Հայաստանի հետ և նույնիսկ հանի իր զորքերը Հայաստանի տարածքից, ապա սկզբունքորեն դա ոչինչ չի փոխի, քանի որ ամեն դեպքում Կովկասում շարունակելու են զենք ձեռք բերել և մատակարարել»,- նման տեսակետ հայտնեց Կռիլովը:
Գնահատելով Նյու Յորքում ընթացող ՄԱԿ ԳԱ-ի 68-րդ նստաշրջանում Միխեիլ Սաակաշվիլիի՝ հայաստանյան հանրությանն ալեկոծած ելույթը՝ նա ասաց, որ Սաակաշվիլին հայտնի է ՌԴ-ի նկատմամբ իր բացասական վերաբերմունքով, Սաակաշվիլին որևէ նոր բան, ըստ էության, չի ասել: «Եթե նա 2008թ. ռուս-վրացական պատերազմի ողջ պատասխանատվությունն ու մեղավորությունը դնում է ՌԴ-ի վրա, նշանակում է՝ նրա ելույթը և դիտարկումները հիմք չեն»,- ասաց Ալեքսանդր Կռիլովը:
Հիշեցնենք, որ սեպտեմբերի 27-ին ՄԱԿ-ի Գլխավոր ասամբլեայի 68-րդ նստաշրջանի աշխատանքներին մասնակցող Հայաստանի արտգործնախարար Էդվարդ Նալբանդյանը հանդիպել էր Ադրբեջանի արտգործնախարար Էլմար Մամեդյարովի, ԵԱՀԿ Մինսկի խմբի համանախագահների, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրչիկի հետ, որի ընթացքում համանախագահները տեղեկացրել էին, որ նախատեսում են տարեվերջին պատրաստվել նախագահների հանդիպմանը:
