Ֆրանսիան պատրաստ է եղել հարվածել Դամասկոսին օգոստոսի 31-ի լույս սեպտեմբերի 1-ի գիշերը և չեղյալ է հայտարարել դա ամենավերջին պահին այն բանից հետո, երբ Վաշինգտոսնը հաղորդել է, որ ԱՄՆ-ը հետաձգում է իր մասնակցությունը գործողությանը: Այս մասին գրում է Nouvel Observateur թերթը՝ վկայակոչելով Ելիսեյան պալատի իր աղբյուրներին:
Պարբերականի տվյալներով՝ Փարիզը սկսել է Սիրիային հարվածելու նախապատրաստական աշխատանքները շաբաթ առավոտյան՝ օգոստոսի 31-ին, այն բանից հետո, երբ զանգ է ստացել Սպիտակ տնից: ԱՄՆ նախագահի վարչակազմի աշխատակիցը զգուշացրել է, որ Բարաք Օբաման երեկոյան կապ կհաստատի իր ֆրանսիացի գործընկեր Ֆրանսուա Օլանդի հետ՝ կարևոր խոսակցության համար: Քանի որ Ֆրանսիայի իշխանությունները հավատացած են եղել, որ խոսքը Սիրիայում համաձայնեցված գործողություն սկսելու մասին կլինի, Օլանդը կարգադրել է Օբամայի հետ զրույցից անմիջապես հետո զինվորական խորհուրդ հրավիրել, որի շրջանակներում մտադիր է եղել Սիրիային հարվածելու պաշտոնական հրաման արձակել:
Բացի դրանից՝ նույն օրը Ֆրանսիայի կառավարությունը քննարկել է հեռուստաալիքներով ռազմական գործողության լուսաբանման քաղաքականությունը:
Ինչպես հաղորդել է պարբերականի աղբյուրը, Սիրիայի ռմբակոծությունը պետք է սկսվեր կիրակի առավոտյան ժամը 03.00-ին: Ենթադրվում էր, որ Rafale կործանիչները կոչնչացնեն Սիրիայի զինված ուժերի և կորպուսի հրամանատարական հրթիռային մարտկոցները, որոնք իբրև թե վերահսկել են քիմիական զենքի կիրառումը:
