Սովորաբար, ավելորդ քաշից ազատվելու համար մարդիկ դիմում են դիետաների և կատարում ֆիզիկական վարժություններ: Բժիշկ Նիլ Սթենլին կարծիք է հայտնել, որ պակաս կարևոր չէ գիշերները լավ քնելը՝ հաղորդում է BBC-ի ռուսական ծառայությունը:
Գաղտնիք չէ, որ Մեծ Բրիտանիայի բնակչությունը խնդիրներ ունի՝ կապված ավելորդ քաշի հետ: Երկրի կառավարությունն ու առողջապահության ազգային ծառայությունը արդարացիորեն կարծում են, որ առողջ ազգ համարվելու համար անհրաժեշտ է նվազեցնել ավելորդ քաշի ցուցանիշները:
Նրանք հանդես են եկել բազմաթիվ նախաձեռնություններով, որոնք, սակայն, գործնականում չեն հանգեցրել ցանկալի արդյունքի:
Համաձայն բազմաթիվ հետազոտությունների՝ անբավարար քունն ու ավելորդ քաշը և ճարպակալումը ուղիղ համեմատական են՝ ինչպես երեխաների, այնպես էլ մեծահասակների շրջանում:
Վերջին 40 տարում մեծացել է անբավարար քնի ցուցանիշը և դրան զուգահեռ՝ ավելացել ավելորդ քաշով կամ ճարպակալմամբ տառապող մարդկանց թիվը:
Մագնիսառեզոնանսային տոմոգրաֆիան ցույց է տվել, որ վատ քունը ազդում է գլխուղեղի այն հատվածի վրա, որը պատասխանատու է որոշումների ընդունման վրա:
Վատ քունը ազդում է նաև քաղցի հորմոնների վրա: Նվազում է լեպտինի մակարդակը՝ հորմոն, որը կարգավորում է սննդի ընդունումն ու զգուշացնում հագեցվածության մասին, դրան հակառակ՝ ավելացնում է գրելինի մակարդակը, որը խթանում է ախորժակը:
