Երևանում պարբերաբար իրականացվող ասֆալտապատման աշխատանքները մայրաքաղաքի բնակիչների համար անհարմարություններ են ստեղծում` կապված տեղաշարժի հետ: Մասնագետները փաստում են` քաղաքակիրթ աշխարհում նման աշխատանքներն արվում են գիշերային ժամերին:
Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանն «Առաջին լրատվական»-ի հետ զրույցում նշեց, որ գիշերն աշխատելու դեպքում պետք է ապահովել անհրաժեշտ լուսավորություն, իսկ դա լրացուցիչ ծախս է: Ասֆալտապատման տարածքները, Գևորգյանի խոսքերով, որոշվում են մասնագետների կողմից: Վարչության պետն անդրադարձավ նաև դեռևս պիտանի ասֆալտապատ հատվածները նոր ասֆալտով պատելու խնդրին: «Կան չափորոշիչներ, սահմանված նորմեր, ասֆալտի ծառայության ժամկետ հասկացություն գոյություն ունի, ես չգիտեմ` ով ինչ է ասում դրա մասին, բայց ոչ ոք ավելորդ գումարներ չունի: Մի մոռացեք, որ հիմնականում գլխավոր պողոտաներն են ասֆալտապատվում, որտեղ ծանրաբեռնված երթևեկ է: Եթե դա չարվի, ապա դրանք շատ ավելի վատ վիճակում կհայտնվեն»,- ասաց նա` նշելով, որ ծառայության ժամկետն անցնելու պատճառով են անցկացվում նման աշխատանքներ:
Գևորգյանը հավաստիացրեց, որ որևէ մեկն առանց հիմնավորման ասֆալտապատում չի իրականացնում, մեծածավալ աշխատանքներ են կատարվում նաև երկրորդական, երրորդական հատվածներում, ինչպես նաև բակային տարածքներում` արդեն երկրորդ տարին անընդմեջ: «Ուզում եմ վստահեցնել, որ բոլոր ճանապարհները հետզհետե կարգի կբերվեն և կունենան պատշաճ տեսք, այնպես որ մեր քաղաքացիները թող չմտահոգվեն: Իրենց բարձրացրած խնդիրները մշտապես քաղաքային իշխանության ուշադրության կենտրոնում են: Վարչական շրջանների կողմից ներկայացվող ժամանակացույցի համաձայն` դրանք ևս հետզհետե ընդգրկվում են և իրականացնում են համապատասխան աշխատանքներ: Չմոռանանք, որ քաղաքն ինքը կանգնած օրգանիզմ չէ, այլ անընդհատ ապրող միջավայր, որում պետք է որոշակի աշխատանք»,- ասաց Գևորգյանը` ընդգծելով, որ այդ աշխատանքն ավարտ չի ունենում, քաղաքային տնտեսությունում անելիքներ միշտ կան:
«Սպառողների միություն» ՀԿ-ի նախագահ Արմեն Պողոսյանը մեզ հետ զրույցում ասաց, որ ասֆալտապատման ժամանակ անպայման պիտի երեք հերթով աշխատեն` այն արագ ավարտելու և քաղաքի երթևեկությանը քիչ վնաս հասցնելու համար: «Մեր քաղաքները խցանվում են, քաղաքակիրթ աշխարհում նման բան չկա. դա արվում է արագ կերպով և անընդհատ ռեժիմով: Չէ՞ որ կան հանգստյան օրեր, երթևեկության ծանրաբեռնվածությունն այդ օրերին տարբեր է: Գիշերային ժամերն առավել ևս պիտի օգտագործվեն, խնդրի լուծումը հայտնի է, ես հայտնագործություն չեմ անում. որքան էլ այն թանկ արժենա, մարդկանց անհարմարություն պատճառելն ավելի թանկ է»,- ասաց նա: Ըստ Պողոսյանի` շինարարությունը, հատկապես` ճանապարհաշինությունն անհատակ տակառ է, հարմար առիթ` չվաստակած գումարներ ձեռք բերելու համար, դա հայտնի է ողջ աշխարհում, այդտեղ ծավալները հեշտ է թաքցնել, աշխատանքի մասը շատ է, աշխատուժի տեսակարար կշիռը՝ ևս, և շատերը գայթակղությանը չեն դիմանում: ՀԿ-ի նախագահի խոսքերով` ճանապարհ կառուցելիս հեշտ է թաքցնել չաշխատած եկամուտները, իսկ վերահսկողությունը մեր քաղաքում ծայրաստիճան վատ է:
«Չափումների մեթոդիկան հայտնի է բոլորին բետոնի հաստություն չափել, ասֆալտից նմուշ վերցնել, որակը պարզել, սակայն ես վերահսկողություն չեմ տեսնում, իսկ դա պետք է լինի չեզոք` նույն մարդուն կամ օրգանին չենթարկվող: Որպես կանոն` ասֆալտը չորս-հինգ տարուց ոչ պակաս պետք է ծառայի, դրանից հետո էլ միայն մակերեսային աշխատանք պիտի տարվի»,- ասաց Պողոսյանը` միաժամանակ նշելով, որ ամենակոպիտ հաշվարկներով անգամ նորմալ ճանապարհները 8-10 տարի ծառայում են:
Նա նշեց, որ մեր երկրում ճանապարհաշինությունը ցավոտ հարց է՝ հավելելով, որ իր համար անհասկանալի է` ինչու են Խաչատուր Աբովյանի արձանի մոտ ճանապարհներ կառուցել. «Խաչատուր Աբովյանը կանգնած է պուրակի ծաղկանոցի մեջտեղում, այստեղ միայն խնամողներն են լինում, այդ հատված մարդ չի մտնում: Ես մանկուց այդ մասով անցնում եմ օրական երկու անգամ, մշտապես այդպես է եղել, չգիտեմ` որ տրամաբանությամբ այնտեղ ճանապարհ ստեղծեցին»:
Պողոսյանը նաև նշում է, որ քաղաքի կենտրոնից հեռու կան ծայրամասային, մայրուղային ճանապարհներ, որոնք անմխիթար վիճակում են: Նրա համոզմամբ՝ քաղաքը պետք է տեր ունենա, իսկ լավ տերը պետք է «ցուցադրականից դուրս հատվածներին էլ ուշադրություն դարձնի»: «Երբեք չենք բողոքում` ինչքան կարելի է եզրաքարերը փոխել: Ավագանու նիստերի ժամանակ հանճարեղ դեմքով նստում են, սակայն երբեք չեմ տեսել, որ քաղաքացու մտահոգությունները բարձրաձայնեն: Առաջարկում ենք անվստահություն հայտնել ավագանուն, բոլորին ուղարկել տուն, բացի միջազգային գրոսմայստերից»,- ասաց Պողոսյանը: Նա իմիջիայլոց նկատեց նաև, որ ավագանու կազմում ներկայացված «Բարև, Երևան» դաշինքին այս հարցում վստահում է:
Լուսանկարը՝ PanARMENIAN Photo-ի
