Այսօր Հայ ազգային կոնգրեսի ներկայացուցիչ Դավիթ Շահնազարյանը «Իրատես դե ֆակտո» ակումբում լրագրողների հետ հանդիպմանը խոսելով արտահերթ նախագահական և արտահերթ խորհրդարանական ընտրությունների մասին՝ նշեց, որ դրանք միակ ելքն են հաղթահարելու խորը և գուցե ավելի խորացող քաղաքական ճգնաժամը, հակառակ իշխանությունների այն հայտարարությունների, թե դրանք կհարվածեն պետության վարկին.
«Ընդհակառակը, արտահերթ ընտրությունները բարձրացնում են պետության վարկը, այլ ճանապարհ գոյություն չունի, և իշխանությունները շատ լավ հասկանում են: Ավելին՝ արտահերթ ընտրությունները բխում են Հայաստանի Հանրապետության ժողովրդի շահերից, դա բխում է նաև Արցախի շահերից, և ես կարծում եմ, որ իշխանությունները պետք է հասկանան, որ դա բխելու է նաև իրենց շահերից: Կհասկանան դա։»,- վստահեցրեց ՀԱԿ-ի ներկայացուցիչը:
Այն կայունությունը, որն այսօր առկա է, ըստ Դ.Շահնազարյանի՝ շնորհիվ Հայ ազգային կոնգրեսի է, և այդ կայունությունը պետք է ամրապնդվի՝ ազատ, արդար ընտրություններով և օրինական իշխանության ձևավորմամբ:
Երկխոսությունը ստեղծված քաղաքական ճգնաժամի արդյու՞նք է, թե՞ դրանից դուրս գալու ելք՝ հարց ուղղեցին լրագրողները. «Իհարկե երկրորդը, ավելին՝ միակ խելամիտ ելքն է այն իմաստով, որ առանց որևէ ցնցումների դա է միակ ճանապարհը՝ հաղթահարելու այս ծանր քաղաքական իրավիճակը, այլ ճանապարհ չկա, մյուս այլ ճանապարհները ցնցումներն են, և մենք ամեն ինչ կանենք, որ դա տեղի չունենա: Արտահերթ ընտրությունները անհարժեշտ են այս արտագաղթը կանգնեցնելու համար»,- հավելեց Դ.Շահնազարյանը։
Այսինքն՝ իշխանություններին համոզելու՞ եք, որպեսզի գնան արտահերթ ընտրությունների՝ հարց ուղղեցին լրագրողները. «Կհամոզվեն, իրենք էլ են արդեն համոզվել»:
Թե ովքեր են լինելու ՀԱԿ-ի պատվիրակության կազմում, ըստ Դ.Շահնազարյանի՝ առաջիկա մեկ-երկու օրերին կհրապարկվի, առայժմ այդ հարցը ՀԱԿ-ում չի քննարկվել:
