«Հայկական ժամանակ» օրաթերթի գլխավոր խմբագիր, ՀԱԿ անդամ Նիկոլ Փաշինյանը այսօր լրագրողների հետ հանդիպման ժամանակ շեշտեց, որ իշխանությունների հետ բանակցությունների հիմնական օրակարգը արտահերթ ընտրություններն են:
Նա նշեց, որ պատվիրակության հարցը դեռևս չի քննարկվել, սակայն ինքը իրեն չի տեսնում այդ պատվիրակության մեջ: Փաշինյանը ընդգծեց, որ արտահերթ ընտրությունների անցկացման համար իրենք պայքարելու են մինչև վերջ, մինչև հերթական ընտրություններ: Ինչ վերաբերում է տեսակետներին, թե ՀԱԿ-ը իշխանությունների հետ ինչ-որ պայմանավորվածությունների կգնա, մասնավորապես խորհրդարանում տեղեր ստանալու վերաբերյալ` Փաշինյանը նշեց.«Եթե նման բան տեղի ուենա, ապա դա նույնն է, որ մարդ խաչ քաշի իր ամբողջ կյանքի վրա, նման բան չի կարող տեղի ունենալ»:
Փաշինյանի կարծիքով ընդդիմության դիրքորոշումը այս ընթացքում չի մեղմացել, ընդհակառակը, էլ ավելի է կոշտացել. «Մեղմացում եղել է, բայց՝ իշխանական դաշտում: Եթե 2008 թվականին ընդդիմությունը ուներ մեկ պահանջ և իշխանությունը չէր կատարում դա, ապա այսօր ընդդիմությունը առաջարկել է երեք պահանջ, որոնք իշխանությունը կատարել է»: