Ղարաբաղյան հիմնախնդրի կարգավորման խնդիրը շարունակում է մնալ ռուս-ադրբեջանական և ռուս-հայկական բարձր մակարդակով բանակցությունների օրակարգի գլխավոր հարցերից մեկը, քանի դեռ այն չի լուծվել: Մոսկվայի Նորագույն պետությունների ինստիտուտի տնօրեն, քաղաքագետ Ալեքսեյ Մարտինովը համոզված է, որ Ռուսաստանը մեծապես շահագրգռված է կոնֆլիկտի կարգավորմամբ և միջնորդական լուրջ ջանքեր է գործադրում հակամարտող կողմերին բանակցային սեղանի շուրջ նստեցնելու համար:
Քաղաքագետը «Առաջին լրատվական»-ի հետ զրույցում նշեց, թե չի բացառում, որ Սոչիում հուլիսի 21-ին կայացած Պուտին-Ալիև հանդիպումը կապված է եղել Հայաստանի և Ադրբեջանի նախագահների միջև նոր հանդիպման կազմակերպչական աշխատանքների հետ:
«Ռուսաստանն ուզում է հասնել ամուր և կայուն խաղաղության Անդրկովկասի տարածաշրջանում»,- ավելացրեց Ալեքսեյ Մարտինովը:
Պուտինի և Ալիևի հանդիպումը, ռուս փորձագետի խոսքերով, պլանային է եղել: Ռուսաստանի նախագահը նման հանդիպումներ է ունենում աշխարհի տարբեր երկրների ղեկավարների, այդ թվում ԱՊՀ երկրների ղեկավարների հետ:
«Այս հանդիպումը պլանային բնույթ ուներ: Այն ծրագրված էր վաղուց, և այս հանդիպման ընթացքում երևելի կամ արտառոց որևէ բան, իմ կարծիքով, չի եղել: Այլ հարց է, որ Ադրբեջանի և Հայաստանի նախագահների հետ Ռուսաստանի նախագահի բանակցությունների ավանդական հարցերից մեկը շարունակում է մնալ ղարաբաղյան հիմնախնդրի կարգավորման հարցը: Բնականաբար, այս հարցը ևս քննարկվել է: Մենք գիտենք, որ վերջերս շփման գծում կրկին որոշ սրացումներ են եղել, և, իհարկե, այս խնդիրը քննարկվել է: Այն մտահոգում է Ռուսաստանին, քանի որ Ռուսաստանը, իմ կարծիքով, հանդիսանում է խաղաղության երաշխավորը Անդրկովկասում, ինչն էլ, ըստ էության, տեղի է ունենում Ռուսաստանի ներկայության շնորհիվ»,- մեկնաբանեց Ալեքսեյ Մարտինովը:
