«Մենք ոչ թե գործող իշխանությունը մեզանով փոխարինելու խնդիր ենք դնում, այլ Հայաստանում սահմանադրական ճանապարհով լեգիտիմ իշխանություն ձևավորելու խնդիր»,- լրագրողների հետ հանդիպմանը նշեց ՀԱԿ անդամ, ՀՀ ՆԳ նախկին նախարար Սուրեն Աբրահամյանը:
Նրա կարծիքով՝ իշխանությունները պետք է լինեն ոչ խոցելի, վայելեն ժողովրդի համակրանքը, քանի որ նոր քաղաքական իրավիճակում արտաքին մարտահրավերներին այլ կերպ դիմակայել հնարավոր չէ:
Ինչ վերաբերում է երկու քաղաքական ուժերի հայացքների, մոտեցումների փոփոխություններին, Սուրեն Աբրահամյանը արձագանքեց. «Ավելի շատ իշխանության վարքագծի մեջ է որոշակի փոփոխություն նկատվում. մենք մեր գիծը բռնած ուղիղ գնում ենք: Ուղղակի որոշակի քայլեր նաև իշխանությունների կողմից են կատարվում:
Սուրեն Աբրահամյանի կարծիքով բոլորի համար պարզ է, որ իշխանություններն այլևս չեն կարող Մարտի 1-ով իշխանություն պահել.
«Դա տեսականորեն և պրակտիկորեն բացառվում է, որովհետև հասարակությունը կարող է մեկ անգամ դա հանդուրժել: Հակառակ դեպքում այնպիսի անկառավարելի պրոցեսներ կարող են լինել, որ ոչ թե Մարտի 1 կլինի, այլ Մարտի 2՝ ավելի ողբերգական առումով»:
