Ինչպես ավելի վաղ տեղեկացրել ենք, այսօր «Ազատագրենք հուշարձանն օլիգարխից» նախաձեռնության մի խումբ անդամներ բողոքի երթ անցկացրեցին՝ «Փակ շուկայի» նախկին տեսքը վերականգնելու պահանջով: Ակտիվիստների վերջին կանգառը եղավ հենց «Փակ շուկան», որտեղ նրանք, ինչպես և նախկինում, հանդիպեցին Սամվել Ալեքսանյանի աջակիցներին: Վերջիններս միաձայն բղավում էին «Բացո՛ւմ», «Ո՛չ գրանտակերներին»,«Դուք դեմ եք 700 աշխատատեղերի բացմանը»:
«Առաջին լրատվական»-ի հետ զրույցում կանանցից մեկը, ով խորհրդարանական ընտրությունների ժամանակ Մալաթիայում խոչընդոտում էր Նիկոլ Փաշինյանի քարոզարշավն, ասաց, որ շուկան բացվելուն պես՝ ինքը և իր ընտանիքի բոլոր անդամներն աշատանք են ունենալու, այդ իսկ պատճառով չի զլանում և ամեն անգամ գալիս, պայքարում է դրա համար. «Փառք ու պատիվ բարերար Սամվել Ալեքսանյանին, որ վերանորոգել, փրկել է շուկան»:
Հարցին, թե արդյոք Ալեքսանյանն իրենց չի՞ վճարում այդտեղ գալու համար, մեր զրուցակիցը պատասխանեց․ «Ո՛չ, պարոն Սամվել Ալեքսանյանը ոչ ոքի չի հրավիրել, չի վարձատրում, ամոթ է, սուտ… Այդ իրենք էին ասում՝ եկեք ձեզ փող տանք, մեր կողմն անցեք: Մի աղջիկ է ինձ առաջարկել, բայց ո՞նց գնայի՝ ինձ աշխատատեղ է պետք»:
Նրանք, ի դեպ, հավաստիացրեցին, որ անձամբ իրենք են պաստառների հեղինակը, շատ լավ ճանաչում են Կարո Եղնուկյանին և վստահ են, որ հենց նրանք են փողի դիմաց գալիս, պայքարում:
Մանրամասները դիտեք մեր տեսանյութում:
