Սիրիայում ծայրահեղականության, անհանդուրժողականության և միջդավանանքային բախումների պատճառը Բաշար Ալ-Ասադի վարչակարգն է: Ինչպես հաղորդում է Anadolu գործակալությունը, այս մասին հայտարարել է Թուրքիայի արտգործնախարար Ահմեդ Դավութօղլուն:
«Սիրիայում ծայրահեղականության տարածման գլխավոր պատճառը Բաշար Ալ-Ասադի վարչակարգն է, քանի որ նման գաղափարների տարածումը ձեռնտու է սիրիական վարչակարգին»,- ասել է Դավութօղլուն:
Նրա խոսքով՝ Թուրքիայում մշտապես աճում է սիրիացի փախստականների թիվը, և ՄԱԿ-ի կանխատեսումների համաձայն՝ մինչև տարեվերջ նրանց թիվը կարող է հասնել մեկ միլիոնի:
Թուրքիայի ներքին գործերի նախարար Մուամեր Գյուլերն իր հերթին հերքել է որոշ ԶԼՄ-ների մեղադրանքը, թե՝ երկիրն աջակցում է Սիրիայում գործող «Ալ-Նուսրա» ահաբեկչական կազմակերպությանը: Հայտարարության մեջ նա նշել է, որ պետք չէ վստահել ինտերնետ-կայքերին և պորտալներին, որոնց օբյեկտիվությունը կասկածելի է:
